கட்டுநாயக்க விமான நிலையத்திற்கு தாய்லாந்திலிருந்து மலேசியா ஊடாக வருகை தந்த இருவர், 8 கோடியே 66 இலட்சத்து 40 ஆயிரம் ரூபாய் பெறுமதியான ‘குஷ்’ ரக போதைப்பொருளுடன் விமான நிலைய பொலிஸ் போதைப்பொருள் தடுப்புப் பிரிவு அதிகாரிகளால் கைது செய்யப்பட்டுள்ளனர்.
கைது செய்யப்பட்டவர்களில் ஒருவர் 35 வயதுடைய நெடுங்கேணியைச் சேர்ந்தவர் என்பதுடன், மற்றையவர் 46 வயதுடைய கண்டிப் பிரதேசத்தைச் சேர்ந்த வர்த்தகர் எனத் தெரிவிக்கப்பட்டுள்ளது.
சந்தேகநபர்கள் இருவரும் தாய்லாந்தில் குறித்த போதைப்பொருளைக் கொள்வனவு செய்த பின்னர், மலேசியாவின் கோலாலம்பூருக்குச் சென்று, அங்கிருந்து மலேசியன் ஏர்லைன்ஸ் நிறுவனத்துக்குச் சொந்தமான MH 179 என்ற விமானம் மூலம் இன்று (16) அதிகாலை 12 மணியளவில் கட்டுநாயக்க விமான நிலையத்தை வந்தடைந்துள்ளனர்.
இதன்போது, அவர்கள் கொண்டு வந்த இரண்டு பயணப் பொதிகளில் மதுபானப் போத்தல்கள் வைக்கப்பட்டிருந்த நான்கு பெட்டிகளில் இருந்து போத்தல்கள் அகற்றப்பட்டு, அவற்றுக்குப் பதிலாக குஷ் ரக போதைப்பொருள் மறைத்து வைக்கப்பட்டிருந்தமை கண்டுபிடிக்கப்பட்டுள்ளது.
நான்கு பொதிகளாகப் பொதி செய்யப்பட்டிருந்த குறித்த போதைப்பொருளின் மொத்த எடை 8 கிலோகிராம் 664 கிராம்கள் எனத் தெரிவிக்கப்பட்டுள்ளது.
கைது செய்யப்பட்ட இருவரையும் இன்று (16) நீர்கொழும்பு நீதவான் நீதிமன்றத்தில் முன்னிலைப்படுத்தி, தடுப்புக் காவல் உத்தரவைப் பெற்று மேலதிக விசாரணைகளை முன்னெடுக்க பொலிஸார் திட்டமிட்டுள்ளனர்.
இதேவேளை, இதே விமானத்தில் முன்னதாக இலங்கை வந்த மற்றுமொரு நபரும் 4 கோடியே 38 இலட்சத்து 40 ஆயிரம் ரூபாய் பெறுமதியான குஷ் ரக போதைப்பொருளுடன் கைது செய்யப்பட்டிருந்தார்.
மாத்தளைப் பிரதேசத்தைச் சேர்ந்த 30 வயதுடைய தொழில்நுட்ப நிபுணரான குறித்த நபரும் தாய்லாந்தில் போதைப்பொருளைக் கொள்வனவு செய்து, மலேசியாவின் கோலாலம்பூர் ஊடாக இலங்கை வந்துள்ளமை விசாரணைகளில் தெரியவந்துள்ளது.








