இலங்கையில் வேலைவாய்ப்பு பெற்றுத் தருவதாகக் கூறி உஸ்பெகிஸ்தான் பெண்ணை நாட்டுக்கு அழைத்து வந்து, அவரை பலவந்தமாக பாலியல் தொழிலில் ஈடுபடுத்திய குற்றச்சாட்டில் முச்சக்கரவண்டி ஓட்டுநர் ஒருவருக்கு கொழும்பு மேல் நீதிமன்றம் 10 ஆண்டுகள் கடூழிய சிறைத்தண்டனை விதித்துள்ளது.
அத்துடன், குற்றவாளிக்கு 10,000 ரூபாய் அபராதமும் விதித்து நீதிமன்றம் தீர்ப்பளித்துள்ளது.
2020 ஆம் ஆண்டின் இறுதிப் பகுதியில், மாதாந்தம் 1,500 அமெரிக்க டொலர் சம்பளத்துடன் வேலைவாய்ப்பு அல்லது குழந்தைகளைப் பராமரிக்கும் பணி வழங்கப்படும் என உறுதியளிக்கப்பட்டதன் பேரில் குறித்த பெண் இலங்கைக்கு அழைத்து வரப்பட்டதாக நீதிமன்றத்தில் தெரிவிக்கப்பட்டுள்ளது.
இலங்கைக்கு வந்த பின்னர், நீர்கொழும்பில் உள்ள வீடொன்றுக்கு அழைத்துச் செல்லப்பட்ட அவர், பாலியல் சேவைக்காக பயன்படுத்தப்பட்டதாகவும், பின்னர் வெள்ளவத்தையில் உள்ள அடுக்குமாடி குடியிருப்பில் தங்கவைக்கப்பட்டு அவரது கடவுச்சீட்டு பறிக்கப்பட்டதாகவும் வழக்கு விசாரணையில் தெரிவிக்கப்பட்டுள்ளது.
இதனைத் தொடர்ந்து, பாதிக்கப்பட்ட பெண் இரகசியமாக தனது தாயாருக்கு தகவல் வழங்கியதையடுத்து, உஸ்பெகிஸ்தான் பொலிஸாரிடம் முறைப்பாடு செய்யப்பட்டதாகவும், அதன் அடிப்படையில் இலங்கை குற்றப்புலனாய்வுத் திணைக்களம் நடவடிக்கை மேற்கொண்டு அவரை மீட்டதாகவும் தெரிவிக்கப்பட்டுள்ளது.
வழக்கு விசாரணையின்போது முன்வைக்கப்பட்ட வங்கி அறிக்கைகள் உள்ளிட்ட சாட்சியங்களின் அடிப்படையில் குற்றம் நிரூபிக்கப்பட்டதாக நீதிமன்றம் தெரிவித்துள்ளது. குறிப்பாக, பாலியல் சேவைக்காக செலுத்தப்பட்ட பணத்தின் ஒரு பகுதி குற்றவாளியின் வங்கிக் கணக்கில் வைப்புச் செய்யப்பட்டிருந்தமை தொடர்பான ஆதாரங்களும் நீதிமன்றத்தில் முன்வைக்கப்பட்டுள்ளன.
இதனையடுத்து, குற்றம் திட்டமிட்டு மேற்கொள்ளப்பட்டதாகக் குறிப்பிட்ட கொழும்பு மேல் நீதிமன்றம், குற்றவாளிக்கு 10 ஆண்டுகள் கடூழிய சிறைத்தண்டனையையும் 10,000 ரூபாய் அபராதத்தையும் விதித்து தீர்ப்பளித்துள்ளது.
