ஐக்கிய குடியரசு முன்னணியின் தலைவர் சம்பிக்க ரணவக்க அண்மையில் வெளியிட்ட கருத்துக்கள் தொடர்பில் அரசாங்கம் உடனடியாக விசாரணை நடத்த வேண்டும் என சமூக நீதிக் கட்சி கோரிக்கை விடுத்துள்ளது.
கடந்த செப்டெம்பர் 29ஆம் திகதி இடம்பெற்ற ஊடக சந்திப்பில் கருத்து வெளியிட்ட சம்பிக்க ரணவக்க, சஹ்ரானின் தீவிரவாதக் குழுவின் தலைமைப் பொறுப்பை கல்முனையைச் சேர்ந்த புதிய ஒருவர் ஏற்றுள்ளதாகவும், உயிர்த்த ஞாயிறு குண்டுத் தாக்குதல் வழக்கில் இருந்து விடுதலையான சிலர் குறித்த குழுவில் இணைந்துள்ளதாகவும் தெரிவித்திருந்தார்.
இலங்கையில் முஸ்லிம்களை இலக்குவைத்து போலியான சமூக வலைத்தளப் பக்கங்கள் ஊடாக திட்டமிட்ட இனவாதப் பிரசாரங்கள் முன்னெடுக்கப்பட்டு வரும் நிலையில், சம்பிக்க ரணவக்கவின் இந்தக் கருத்துக்கள் மேலும் இனவாத பதற்றத்தை ஏற்படுத்தும் வகையில் அமைந்துவிடக்கூடாது என சமூக நீதிக் கட்சி தெரிவித்துள்ளது.
எனவே, சம்பிக்க ரணவக்கவை அரசாங்கம் உடனடியாக அழைத்து விசாரணைக்கு உட்படுத்த வேண்டும் என அந்தக் கட்சி கோரியுள்ளது.
அவர் தெரிவித்த கருத்துக்கள் உண்மையானவை எனில், அது தொடர்பான விசாரணைகளை உடனடியாக முன்னெடுத்து, அவ்வாறான தீவிரவாதக் குழுக்கள் இருப்பது உறுதிப்படுத்தப்பட்டால் சட்டத்தின் முன் நிறுத்த வேண்டும் எனவும் கோரிக்கை விடுக்கப்பட்டுள்ளது.
அதேவேளை, சம்பிக்க ரணவக்க தெரிவித்த கருத்துக்களில் எவ்வித உண்மையும் இல்லை என விசாரணைகளில் தெரியவருமாயின், அவருக்கு எதிராக உரிய சட்ட நடவடிக்கை எடுக்க வேண்டும் என்றும் சமூக நீதிக் கட்சி அரசாங்கத்திடம் வலியுறுத்தியுள்ளது.
