முன்னாள் அமைச்சர் விமல் வீரவன்சவின் மனைவி ஷஷி வீரவன்சவுக்கு முறைகேடான இராஜதந்திர கடவுச்சீட்டை வைத்திருந்த குற்றச்சாட்டில் விதிக்கப்பட்ட இரண்டு ஆண்டு சிறைத்தண்டனையை இலங்கை உச்சநீதிமன்றம் உறுதிப்படுத்தியுள்ளது.
குறித்த தண்டனைக்கு எதிராக அவர் தாக்கல் செய்த மேன்முறையீட்டை உச்சநீதிமன்றம் நிராகரித்ததைத் தொடர்ந்து, ஏற்கனவே விதிக்கப்பட்ட சிறைத்தண்டனை தொடர்ந்து அமுலில் இருக்கும்.
கடந்த 2022ஆம் ஆண்டு மே மாதம் 27ஆம் திகதி, கொழும்பு நீதவான் நீதிமன்றம் ஷஷி வீரவன்சவை குற்றவாளியாகக் கண்டறிந்து இரண்டு ஆண்டு சிறைத்தண்டனையும் ஒரு இலட்சம் ரூபாய் அபராதமும் விதித்திருந்தது.
இதனை எதிர்த்து அவர் கொழும்பு மேல் நீதிமன்றத்தில் மேன்முறையீடு செய்திருந்தார். எனினும், கடந்த 2026ஆம் ஆண்டு ஜூன் மாதம் 11ஆம் திகதி அந்த மேன்முறையீட்டை நிராகரித்த மேல் நீதிமன்றம், ஆரம்பத்தில் விதிக்கப்பட்ட தண்டனையை உறுதிப்படுத்தியது.
இதனையடுத்து அவர் உச்சநீதிமன்றத்தில் மீண்டும் மேன்முறையீடு செய்திருந்த நிலையில், தற்போது அதுவும் நிராகரிக்கப்பட்டுள்ளதாக தெரிவிக்கப்பட்டுள்ளது.
இதன் மூலம் ஷஷி வீரவன்சவுக்கு விதிக்கப்பட்ட இரண்டு ஆண்டு சிறைத்தண்டனையும் ஒரு இலட்சம் ரூபாய் அபராதமும் தொடர்கின்றன.







