பரீட்சைத் திணைக்களத்தின் இரகசியப் பிரிவில் பணியாற்றிய முன்னாள் பிரதி ஆணையாளர் ஒருவரின் பிள்ளை, சட்டமா அதிபர் திணைக்களத்தால் நடத்தப்பட்ட பரீட்சையொன்றில் முதலிடம் பெற்றுள்ளதாக மாத்தளை மாவட்ட நாடாளுமன்ற உறுப்பினர் ரோஹினி குமாரி விஜேரத்ன தெரிவித்துள்ளார்.
நாடாளுமன்றில் அண்மையில் நடைபெற்ற விவாதத்தில் கலந்துகொண்டு உரையாற்றும்போதே அவர் இந்தக் குற்றச்சாட்டை முன்வைத்துள்ளார்.
இது தொடர்பில் மேலும் தெரிவித்த அவர், பரீட்சைத் திணைக்களத்தின் இரகசியப் பிரிவில் பணியாற்றிய முன்னாள் பிரதி ஆணையாளர் ஒருவர், குறித்த பரீட்சை நடைபெறுவதற்கு முன்னரே பதவியிலிருந்து விலகியிருக்க வேண்டியிருந்ததாகக் குறிப்பிட்டார்.
எனினும், அவர் ஜூலை 15ஆம் திகதியே பதவியிலிருந்து விலகியதாகவும், குறித்த பரீட்சை ஆகஸ்ட் 2ஆம் திகதி நடைபெற்றதாகவும் அவர் சுட்டிக்காட்டினார்.
பதவியிலிருந்து விலகுவதற்கு முன்னரே பரீட்சைக்கான வினாத்தாள்கள் தயாரிக்கப்பட்டிருந்ததாகவும், அவற்றை அணுகுவதற்கான முழுமையான வாய்ப்பு குறித்த அதிகாரிக்கு இருந்ததாகவும் ரோஹினி விஜேரத்ன குற்றஞ்சாட்டினார்.
அனைத்து நடவடிக்கைகளும் நிறைவடைந்த பின்னரே அவர் பதவியிலிருந்து விலகியுள்ளதாகக் குறிப்பிட்ட அவர், இந்த விவகாரம் தொடர்பில் இலஞ்சம் அல்லது ஊழல் பற்றிய சார்த்துதல்களை விசாரணை செய்யும் ஆணைக்குழு விசாரணைகளை முன்னெடுக்க வேண்டும் எனக் கோரிக்கை விடுத்தார்.
அத்துடன், அபிவிருத்தி உத்தியோகத்தர்களுக்குப் பயிற்சிகள் வழங்கப்பட்ட பின்னர் அவர்கள் புறக்கணிக்கப்படுவதாகவும், இதுவும் பொதுமக்களின் நிதியைத் தவறாகப் பயன்படுத்துவதற்கு ஒப்பானது எனவும் அவர் தெரிவித்தார்.
எனவே, இந்த விவகாரங்கள் தொடர்பிலும் இலஞ்ச ஊழல் ஒழிப்பு ஆணைக்குழு உரிய கவனம் செலுத்தி விசாரணைகளை முன்னெடுக்க வேண்டும் என அவர் வலியுறுத்தியுள்ளார்.







