ஆபத்தான மருந்துகள் திருத்தச் சட்டமூலங்கள் தொடர்பில் உயர் நீதிமன்றம் முக்கியத் தீர்மானம்!

நச்சுக்கள், அபின்கள் மற்றும் ஆபத்தான மருந்துகள் கட்டளைச் சட்டத்தின் கீழான இரண்டு திருத்தச் சட்டமூலங்களையும் நாடாளுமன்றத்தில் சாதாரண பெரும்பான்மையுடன் நிறைவேற்ற முடியும் என உயர் நீதிமன்றம் தீர்மானித்துள்ளதாகப் பிரதிச் சபாநாயகர் ரிஸ்வி சாலி அறிவித்துள்ளார்.

அரசியலமைப்பின் 121(1) உறுப்புரையின் கீழ் சவாலுக்கு உட்படுத்தப்பட்டிருந்த 2026ஆம் ஆண்டின் 79ஆம் இலக்க மற்றும் 80ஆம் இலக்க நச்சுக்கள், அபின்கள் மற்றும் ஆபத்தான மருந்துகள் (திருத்த) சட்டமூலங்களை உயர் நீதிமன்றம் பரிசீலித்துள்ளதாக அவர் நாடாளுமன்றத்தில் தெரிவித்தார்.

இதன்படி, 2026ஆம் ஆண்டின் 79ஆம் இலக்க சட்டமூலத்தை, குழுநிலை விவாதத்தின்போது குறிப்பிட்ட திருத்தங்களை மேற்கொள்வதற்கு உட்பட்டு, சாதாரண பெரும்பான்மையுடன் நிறைவேற்ற முடியும் என நீதிமன்றம் தீர்மானித்துள்ளது.

குறித்த திருத்தங்களில், முன்மொழியப்பட்ட 77A(5) பிரிவில் மாற்றங்களை மேற்கொள்வதும், சந்தேகநபர் நீதிமன்றத்தில் முன்னிலையாகும் திகதி மற்றும் தொடர்புடைய அறிக்கைகள் சந்தேகநபருக்கோ அல்லது அவரது சட்டத்தரணிக்கோ கையளிக்கப்படும் திகதி தொடர்பான தெளிவுபடுத்தல்களைச் சேர்ப்பதும் உள்ளடங்குகின்றன.

இதேவேளை, 2026ஆம் ஆண்டின் 80ஆம் இலக்க சட்டமூலம் அரசியலமைப்பின் எந்தவொரு ஏற்பாட்டுடனும் முரண்படவில்லை என உயர் நீதிமன்றம் தீர்மானித்துள்ளது. இதனால், அந்தச் சட்டமூலத்தையும் நாடாளுமன்றத்தில் சாதாரண பெரும்பான்மையுடன் நிறைவேற்ற முடியும் என அறிவிக்கப்பட்டுள்ளது.

உயர் நீதிமன்றத்தின் தீர்மானங்களை அன்றைய நாடாளுமன்ற உத்தியோகபூர்வ நடவடிக்கை அறிக்கையில் உள்ளடக்குமாறும் பிரதிச் சபாநாயகர் ரிஸ்வி சாலி பணிப்புரை விடுத்துள்ளார்.