பிரபல இந்திய சமையல் கலைஞரும், தொலைக்காட்சி நிகழ்ச்சிகளின் நடுவருமான செஃப் தாமு உடல்நலக்குறைவு காரணமாக தனது 72 ஆவது வயதில் இன்று (25) காலமானதாக இந்திய ஊடகங்கள் செய்தி வெளியிட்டுள்ளன.
உடல்நலப் பாதிப்பு காரணமாக சென்னையிலுள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வந்த அவர், சிகிச்சை பலனின்றி உயிரிழந்ததாகத் தெரிவிக்கப்பட்டுள்ளது.
சமையல் கலையில் தனித்துவமான திறமையை வெளிப்படுத்திய செஃப் தாமு, விஜய் தொலைக்காட்சியில் ஒளிபரப்பாகும் பிரபல சமையல் நிகழ்ச்சியான ‘குக் வித் கோமாளி’ மூலம் பெரும் ரசிகர் பட்டாளத்தைப் பெற்றிருந்தார்.
சென்னைப் பல்கலைக்கழகத்தில் ஹோட்டல் மேலாண்மை மற்றும் உணவு வழங்கல் தொழில்நுட்பத் துறையில் முனைவர் பட்டம் பெற்ற முதல் இந்தியச் சமையல் கலைஞர் என்ற பெருமையையும் அவர் பெற்றிருந்தார்.
தனது தொழில் வாழ்க்கையின் ஆரம்பத்தில் உணவகங்களில் பாத்திரம் கழுவும் பணியில் ஈடுபட்ட அவர், கடின உழைப்பாலும் சமையல் துறையில் கொண்டிருந்த ஆர்வத்தாலும் படிப்படியாக உயர்ந்து, இந்தியாவின் புகழ்பெற்ற சமையல் கலைஞர்களில் ஒருவராகத் திகழ்ந்தார்.
கடந்த 2010ஆம் ஆண்டு தொடர்ந்து 24 மணித்தியாலங்கள், 30 நிமிடங்கள், 12 விநாடிகள் சமையல் செய்து 617 வகையான உணவுகளைத் தயாரித்து கின்னஸ் உலகச் சாதனையைப் படைத்திருந்தார். சுமார் 190 கிலோகிராம் எடையுடைய உணவுகளைத் தயாரித்தமை அவரது சாதனையின் சிறப்பம்சமாகும்.
அவரது சமையல் துறைப் பங்களிப்பைப் பாராட்டி, இந்திய அரசாங்கம் 2025ஆம் ஆண்டு அவருக்குப் பத்மஸ்ரீ விருதையும் வழங்கிக் கௌரவித்திருந்தது.
இதற்கிடையில், ‘குக் வித் கோமாளி’ நிகழ்ச்சியின் ஏழாவது பருவ அரையிறுதிப் போட்டியில் அவர் பங்கேற்காததைத் தொடர்ந்து, கடந்த ஆகஸ்ட் மாதம் அவரது உடல்நிலை தொடர்பில் பல்வேறு வதந்திகள் பரவின. அப்போது காணொளி ஒன்றை வெளியிட்ட அவர், தான் நலமாக இருப்பதாகத் தெரிவித்து அந்த வதந்திகளுக்கு முற்றுப்புள்ளி வைத்திருந்தார்.
செஃப் தாமுவின் மறைவு குறித்த செய்திகள் வெளியாகியுள்ள நிலையில், அவரது குடும்பத்தினர், திரையுலகினர் மற்றும் ரசிகர்களின் அதிகாரப்பூர்வ இரங்கல் அறிக்கைகள் தொடர்பான மேலதிக தகவல்கள் எதிர்பார்க்கப்படுகின்றன.
