கனமழையால் நான்கு நீர்த்தேக்கங்களின் வான் கதவுகள் திறப்பு; தாழ்நிலப் பகுதிகளில் வசிப்போருக்கு எச்சரிக்கை!

நாட்டில் தொடர்ந்து பெய்துவரும் கனமழை காரணமாகப் பல பிரதான நீர்த்தேக்கங்களின் நீர்மட்டம் அதிகரித்துள்ள நிலையில், தெதுரு ஓயா, ராஜங்கனை, குக்குளே கங்கை மற்றும் கலாவாவி ஆகிய நீர்த்தேக்கங்களின் வான் கதவுகள் திறக்கப்பட்டுள்ளதாக நீர்ப்பாசனத் திணைக்களம் தெரிவித்துள்ளது.

இதனால் குறித்த நீர்த்தேக்கங்களின் கீழ்ப்பகுதிகளில் அமைந்துள்ள ஆறுகள் மற்றும் ஓடைகளுக்கு அருகில் வசிக்கும் மக்கள் மிகுந்த அவதானத்துடன் இருக்குமாறு அறிவுறுத்தப்பட்டுள்ளனர்.

தெதுரு ஓயா நீர்த்தேக்கத்தின் நீர்மட்டத்தைக் கட்டுப்படுத்தும் நோக்கில், அதன் எட்டு வான் கதவுகளும் தலா இரண்டு அடி வீதம் திறக்கப்பட்டுள்ளன. இதன் ஊடாகத் தெதுரு ஓயாவுக்கு வினாடிக்கு 10,400 கன அடி நீர் வெளியேற்றப்பட்டு வருகிறது.

நீர்ப்பிடிப்புப் பகுதிகளில் கிடைக்கும் மழைவீழ்ச்சி மற்றும் நீர்த்தேக்கத்திற்கு வந்துசேரும் நீரின் அளவைப் பொறுத்து, வான் கதவுகள் திறக்கப்படும் அளவு எதிர்வரும் காலங்களில் மாற்றமடையக்கூடும் என நீர்ப்பாசனத் திணைக்களம் குறிப்பிட்டுள்ளது.

ராஜங்கனை நீர்த்தேக்கத்தின் ஆறு வான் கதவுகள் திறக்கப்பட்டுள்ளதுடன், கலா ஓயாவுக்கு வினாடிக்கு 3,800 கன அடிக்கும் அதிகமான நீர் வெளியேற்றப்பட்டு வருகிறது.

இந்த நீர் வெளியேற்றம் முற்பகல் 9 மணியளவில் வினாடிக்கு 8,000 கன அடியாக அதிகரிக்கப்படும் என எதிர்பார்க்கப்பட்டுள்ளதுடன், நிலவும் வானிலை நிலைமைகளுக்கு ஏற்ப இந்தத் தீர்மானத்தில் மாற்றங்கள் ஏற்படலாம் எனவும் தெரிவிக்கப்பட்டுள்ளது

குக்குளே கங்கை நீர்த்தேக்கத்தின் நீர்ப்பிடிப்புப் பகுதிகளில் பெய்துவரும் மழையைக் கருத்திற்கொண்டு, அதன் ஒரு வான் கதவு திறக்கப்பட்டுள்ளது.

இதன் மூலம் வினாடிக்கு 45 கன மீற்றர் நீரும், மின்சார உற்பத்தியின்போது வினாடிக்கு 48 கன மீற்றர் நீரும் வெளியேற்றப்படுகின்றன. இதற்கமைய, குடா ஓயாவுக்கு வெளியேற்றப்படும் மொத்த நீரின் அளவு வினாடிக்கு 93 கன மீற்றராக உள்ளதாக நீர்த்தேக்கப் பொறுப்பதிகாரி தெரிவித்துள்ளார்.

தொடர்ச்சியான மழை காரணமாகக் கலாவாவியின் நீர்மட்டமும் அதிகரித்துள்ளது. மேல் நீர்ப்பிடிப்புப் பகுதிகளில் பெய்துவரும் மழையால் தம்புள்ள ஓயா ஊடாக வினாடிக்கு சுமார் 5,500 கன அடி நீர் கலாவாவியை வந்தடைகிறது.

நீர்த்தேக்கம் வான் பாயும் அபாயத்தைக் கருத்திற்கொண்டு, அதன் இரண்டு அவசர வான் கதவுகளும் தலா ஆறு அங்குலம் திறக்கப்பட்டுள்ளன. இதன் மூலம் கலா ஓயாவுக்கு வினாடிக்கு 511 கன அடி நீர் வெளியேற்றப்பட்டு வருகிறது.

நீர்த்தேக்கங்களிலிருந்து வெளியேற்றப்படும் நீரின் அளவு அதிகரிக்கக்கூடும் என்பதால், அவற்றின் கீழ்ப்பகுதிகளில் வசிக்கும் மக்கள் ஆறுகள், ஓடைகள் மற்றும் தாழ்நிலப் பகுதிகளில் ஏற்படும் நீர்மட்ட மாற்றங்கள் குறித்து விழிப்புடன் இருக்குமாறு அறிவுறுத்தப்பட்டுள்ளனர்.

மேலும், நீர்த்தேக்கங்களின் வான் கதவுகள் திறக்கப்படுவது மற்றும் நீர் வெளியேற்றம் தொடர்பாக நீர்ப்பாசனத் திணைக்களம் மற்றும் அனர்த்த முகாமைத்துவப் பிரிவினால் வெளியிடப்படும் உத்தியோகபூர்வ அறிவிப்புகளைப் பின்பற்றி, தேவையான பாதுகாப்பு நடவடிக்கைகளை மேற்கொள்ளுமாறும் பொதுமக்கள் கேட்டுக்கொள்ளப்பட்டுள்ளனர்.