மட்டக்களப்பு, செட்டிபாளையம் பகுதியில் உள்ள வீடொன்றில் இருந்து சுமார் 60 இலட்சம் ரூபா பெறுமதியான மூன்று சட்டவிரோத சுருக்கு வலைகளைப் பொலிஸார் கைப்பற்றியுள்ளதுடன், அவற்றை உடைமையில் வைத்திருந்த மீனவர் ஒருவரையும் கைது செய்துள்ளனர்.
இந்தக் கைது நடவடிக்கை நேற்று ஞாயிற்றுக்கிழமை (25) மாவட்ட குற்ற விசாரணைப் பிரிவினரால் முன்னெடுக்கப்பட்டதாக களுவாஞ்சிக்குடி பொலிஸார் தெரிவித்தனர்.
மட்டக்களப்பு ஊழல் மோசடி மற்றும் போதைப்பொருளுக்கு எதிரான அமைப்பினருக்கு மீனவர்கள் வழங்கிய இரகசியத் தகவலின் அடிப்படையில், குறித்த தகவல் மாவட்ட குற்ற விசாரணைப் பிரிவினருக்கு வழங்கப்பட்டுள்ளது.
இதனையடுத்து, சம்பவ தினமான நேற்று மாலை செட்டிபாளையம் பகுதியில் அமைந்துள்ள வீடொன்றைப் பொலிஸார் முற்றுகையிட்டு சோதனையிட்டுள்ளனர்.
இதன்போது, அந்த வீட்டில் மறைத்து வைக்கப்பட்டிருந்த சுமார் 60 இலட்சம் ரூபா பெறுமதியான மூன்று சட்டவிரோத சுருக்கு வலைகள் மீட்கப்பட்டதுடன், அவற்றின் உரிமையாளரான மீனவரும் கைது செய்யப்பட்டுள்ளார்.
கைது செய்யப்பட்ட நபர் நீண்டகாலமாகச் சட்டவிரோத சுருக்கு வலைகளைப் பயன்படுத்தி மீன்பிடியில் ஈடுபட்டு வந்துள்ளதாகப் பொலிஸாரின் ஆரம்பகட்ட விசாரணைகளில் தெரியவந்துள்ளது.
கைது செய்யப்பட்ட சந்தேகநபரை இன்று திங்கட்கிழமை களுவாஞ்சிக்குடி நீதவான் நீதிமன்றத்தில் முன்னிலைப்படுத்துவதற்கான நடவடிக்கைகளைப் பொலிஸார் மேற்கொண்டு வருகின்றனர்.
சம்பவம் தொடர்பான மேலதிக விசாரணைகளை மாவட்ட குற்ற விசாரணைப் பிரிவினரும் பொலிஸாரும் முன்னெடுத்து வருகின்றனர்.
