நாட்டில் நிலவிய சீரற்ற வானிலை காரணமாக நேற்று (27) நாடளாவிய ரீதியில் பாடசாலைகளை மூடுவதற்கு எடுக்கப்பட்ட தீர்மானம் தொடர்பில் தமது திணைக்களத்திடம் எந்தவொரு ஆலோசனையும் பெறப்படவில்லை என வளிமண்டலவியல் திணைக்களத்தின் பணிப்பாளர் நாயகம் அஜித் விஜேமான்ன தெரிவித்துள்ளார்.
இது தொடர்பாக தேசிய நாளிதழ் ஒன்று இன்று (28) வெளியிட்ட செய்தியில், பாடசாலைகளை மூடுவதற்கான தீர்மானம் வளிமண்டலவியல் திணைக்களத்துடன் கலந்தாலோசிக்காமல் எடுக்கப்பட்டதாகக் குறிப்பிடப்பட்டுள்ளது.
பாடசாலைகளைத் தொடர்ந்து நடத்துவதா அல்லது மூடுவதா என்பது குறித்து தமது திணைக்களத்திடம் எந்தவொரு ஆலோசனையும் கோரப்படவில்லை எனவும், இது தொடர்பாக எவ்விதக் கலந்துரையாடலும் இடம்பெறவில்லை எனவும் பணிப்பாளர் நாயகம் தெரிவித்துள்ளதாக அந்தச் செய்தியில் குறிப்பிடப்பட்டுள்ளது.
மேலும், நேற்று நாடளாவிய ரீதியில் பாடசாலைகளை மூடுவதற்கான தீர்மானத்தைத் தமது திணைக்களம் எடுக்கவில்லை என்றும் அவர் சுட்டிக்காட்டியுள்ளதாகத் தெரிவிக்கப்பட்டுள்ளது.
இதேவேளை, ‘அர்னாப்’ புயல் இந்தியாவை நோக்கி நகர்ந்து செல்வதால், இலங்கையில் அதன் தாக்கம் படிப்படியாகக் குறைந்து வருவதாக வளிமண்டலவியல் திணைக்களம் தெரிவித்துள்ளது.
