வடக்கைச் சேர்ந்த மற்றுமொரு தமிழ் எழுத்தாளரின் நாவல் இலங்கை சுங்கத் திணைக்களத்தினால் தடுத்து வைக்கப்பட்டுள்ளது. தற்போது நான்கு எழுத்தாளர்களின் நூல்கள் தடுத்து வைக்கப்பட்டுள்ளதாக தெரிவித்துள்ள எழுத்தாளர்கள் குழுவொன்று தெரிவித்துள்ளது.
இவ்வாறான சட்டவிரோத நடவடிக்கைகளுக்கு அரசாங்கம் பொறுப்பேற்க வேண்டும் எனவும், தடுத்து வைக்கப்பட்டுள்ள நூல்களை உடனடியாக விடுவிக்க வேண்டும் எனவும், மேலும் எதிர்காலத்தில் இவ்வாறான சம்பவங்கள் மீண்டும் இடம்பெறாமல் இருப்பதை உறுதிசெய்யும் வகையில், வெளிப்படைத்தன்மையுடனும் நியாயமான முறையிலும் அமைந்த நடைமுறையொன்றை இலங்கை அரசாங்கம் உறுதிப்படுத்த வேண்டும் எனவும் கூட்டறிக்கையொன்றை வெளியிட்டு அந்த குழு இலங்கை கோரிக்கை விடுத்துள்ளது.
கடந்த ஏழு மாதங்களாக தடுத்து வைக்கப்பட்டுள்ள இரண்டு தமிழ் நூல்களின் பிரதிகளை விடுவிக்குமாறு இலங்கை மனித உரிமைகள் ஆணைக்குழு பரிந்துரை செய்துள்ள நிலையிலேயே, இலங்கை சுங்கத் திணைக்களம் புதிதாக மேலும் சில தமிழ் நூல்களை தடுத்து வைத்துள்ளது.
தமிழ்நாட்டின் காலச்சுவடு பதிப்பகத்திலிருந்து இலங்கைக்கு அனுப்பப்பட்ட தனது ‘தோறை’ நாவலின் 30 பிரதிகளைப் பெற்றுக்கொள்வதற்காக, தாம் ஒக்டோபர் 22ஆம் திகதி யாழ்ப்பாணம் தபால் நிலையத்தில் அமைந்துள்ள சுங்கப் பிரிவுக்குச் சென்றதாக ‘யதார்த்தன்’ என்ற பெயரில் தமிழ் வாசகர்கள் அறியப்பட்ட நாவலாசிரியரான பிரதீப் குணரத்ணம் தெரிவித்துள்ளார்.
யாழ்ப்பாணம் தபால் நிலையத்தில் அமைந்துள்ள சுங்கப் பிரிவுக்குச் சென்று, தனது அடையாளத்தை உறுதிப்படுத்தும் ஆவணங்களைச் சமர்ப்பித்த பின்னர், குறித்த நூலை பரிசோதித்த சுங்க அதிகாரிகள், பாதுகாப்பு அமைச்சின் அனுமதி கிடைத்த பின்னர் மாத்திரமே அந்த புத்தகங்களை வழங்க முடியும் என எழுத்தாளரிடம் தெரிவித்துள்ளனர்.
ஜனாதிபதி, பாதுகாப்பு அமைச்சு, இலங்கை சுங்கத் திணைக்களம் மற்றும் ஊடகங்களுக்கு அனுப்பப்பட்ட எழுத்தாளர்களின் கூட்டறிக்கையின் பிரதிகளில், இலங்கை எழுத்தாளர்களின் நூல்களைக் கொண்ட பொதிகள் தபால் மூலம் இலங்கைக்குக் கொண்டுவரப்படும்போது, சுங்கத் திணைக்களம் அவற்றில் சில பொதிகளைத் தடுத்து வைத்துள்ளதாக வலியுறுத்தப்பட்டுள்ளது.
குறித்த நூல்களில் இடம்பெற்றுள்ள சில சொற்கள் அல்லது அவற்றின் வெளிப்புற அட்டைப்படங்கள் அரசியல் ரீதியான சர்ச்சைகளை ஏற்படுத்தக்கூடும் எனக் கருதப்படுவதே இதற்குக் காரணம் என சுங்க அதிகாரிகள் தெரிவித்துள்ளனர். தடுத்து வைக்கப்பட்டுள்ள நூல்களை மீளப் பெற்றுக்கொள்வதற்கு பாதுகாப்பு அமைச்சின் அனுமதி அவசியம் என சுங்க அதிகாரிகள் கூறியுள்ளதுடன், அந்த நூல்களின் பிரதிகள் பாதுகாப்பு அமைச்சின் அனுமதியை பெறுவதற்காக அனுப்பி வைக்கப்பட்டுள்ளதாகவும் குறிப்பிட்டனர்.
எனினும், இவ்வாறு அனுப்பி வைக்கப்படும் நூல்கள் தொடர்பாகப் பாதுகாப்பு அமைச்சு எந்தவொரு பரிந்துரையையும் வழங்காமல், அதேவேளை, வேறு எந்த நடவடிக்கையும் எடுக்காமல் அவை தொடர்ந்து களஞ்சியப்படுத்தப்பட்டு வைக்கப்படுகின்றன. இதனால், தடுத்து வைக்கப்பட்டுள்ள நூல்கள் அவற்றின் உரிமையாளர்களிடம் மீண்டும் சென்றடைவதில்லை என்பதையும் அந்தக் கூட்டறிக்கையில் சுட்டிக்காட்டப்பட்டுள்ளது.
அரசின் இந்த அநீதியான வெளிப்படைத்தன்மையற்ற நடைமுறைக்கு எதிராகப் பல்வேறு முறைப்பாடுகள் செய்யப்பட்டதுடன், அடையாள ரீதியான நடவடிக்கைகளும் முன்னெடுக்கப்பட்டன. எனினும், அரசாங்கத்திடமிருந்து இதுவரை பொறுப்புணர்வுடன் கூடிய எந்தவொரு பதிலும் கிடைக்கவில்லை. அத்துடன், தடுத்து வைக்கப்பட்டுள்ள நூல்களை விடுவிப்பதற்கான தெளிவான நடவடிக்கைகள் எதனையும் அரசாங்கம் முன்னெடுக்கவில்லை எனவும் அந்த கூட்டறிக்கையில் சுட்டிக்காட்டப்பட்டுள்ளதுடன் இதுவரை நான்கு எழுத்தாளர்களின் நூல்கள் தடுத்து வைக்கப்பட்டுள்ளமை குறித்தும் அந்த அறிக்கையில் குறிப்பிடப்பட்டுள்ளது.
அவ்வாறு இதுவரை தடுத்து வைக்கப்பட்டுள்ள நூல்களில், தீபச்செல்வனின் ‘எழுத்தால் நான் யுத்தம் செய்கிறேன்’, ‘இப்போதும் இங்கே இரண்டு தேசங்கள்தான்’, ஷோபா சக்தியின் ‘1990: லைடன் தீவு – மண்டைதீவு படுகொலைகளும் புதைகுழிகளும்’, டிலுக்சன் மோகனின் ‘படுபட்சி’, இரயாகரின் ‘அரசியல் அனாதை’ ஆகிய நூல்கள் அடங்குகின்றன. அண்மையில் வெளியிடப்பட்ட எழுத்தாளர் யதார்த்தனின் ‘தோறை’ நாவலையும் சுங்கத் திணைக்களம் தடுத்து வைத்துள்ளது.
பிரதீபன் தீபச்செல்வனின் தமிழ் நூல்களை மீண்டும் பெறுவதற்காக, ஏழு மாதங்களுக்கும் மேலாகப் பல்வேறு வழிகளில் தீவிர முயற்சிகள் மேற்கொள்ளப்பட்டு வருகின்றன. குறித்த நூல்களை விடுவிக்குமாறு இலங்கை மனித உரிமைகள் ஆணைக்குழு பரிந்துரை செய்திருந்த போதிலும், அவை இதுவரை விடுவிக்கப்படவில்லை.
இதன்போதும், அரசாங்க அதிகாரிகள் தமது பொறுப்புகளிலிருந்து விலகிக்கொள்ள முயன்ற நாடகமாடும் செயற்பாட்டை இலங்கை மனித உரிமைகள் ஆணைக்குழுவின் அறிக்கை வெளிப்படுத்தியிருந்தது.
“இலங்கை சுங்கத் திணைக்களம் இந்த விடயத்தைப் பாதுகாப்பு அமைச்சிடம் ஒப்படைத்தது. அந்த நூல்கள் தேசிய பாதுகாப்புக்கு அச்சுறுத்தலாக அமையக்கூடும் என ஏற்கனவே தெரிவித்திருந்த பாதுகாப்பு அமைச்சு, இந்த விடயத்தை புத்தசாசன, சமய மற்றும் கலாசார அலுவல்கள் அமைச்சிடம் ஒப்படைக்க விரும்பியது. குறித்த விடயம் தனது அதிகார வரம்புக்கு உட்பட்டதல்ல எனக் கூறி, அதனைப் பொறுப்பேற்க மறுத்த கலை மன்றம், இறுதியில் அந்தப் பொறுப்பை வெளி தமிழ் மொழி நிபுணர்களிடம் ஒப்படைத்தது” என ஆணைக்குழு தெரிவித்துள்ளது.
தடுத்து வைக்கப்பட்டுள்ள தனது முந்நூற்று அறுபது நூல்களையும் விடுவிப்பதற்கு தலையிட்டு நடவடிக்கை எடுப்பதாகக் கலைஞர் எனப் பெயர்பெற்ற அமைச்சர் கலாநிதி ஹினிதும சுனில் செனவி உறுதியளித்து, அரை ஆண்டிற்கும் மேலாக கடந்துள்ள போதிலும், அந்த நூல்கள் இதுவரை விடுவிக்கப்படாமை குறித்து சிங்கள வாசகர்களின் மதிப்பையும் பாராட்டையும் பெற்றுள்ள தமிழ் எழுத்தாளர் பிரதீபன் தீபச்செல்வன், கடும் மன உளைச்சலுக்கு உள்ளாகியுள்ளார்.
யாழ்ப்பாணத்தில் உள்ள சுங்க அலுவலகத்தின் ஊடாக நூல்களை தடுத்து வைக்கும்போது, அரசியல் பின்னணியைக் கொண்ட நூல்களை இலக்கு வைத்துச் செயற்படுவதாக எழுத்தாளர்கள் குழு தமது கூட்டறிக்கையில் வலியுறுத்தியுள்ளது.
“யுத்தம், இராணுவம், துப்பாக்கிகள், விடுதலைப் புலிகள், புதைகுழிகள் போன்ற சொற்களைக் பார்த்தவுடன் அவர்கள் அந்த நூல்களைத் தடுத்து வைக்கின்றனர். சில சொற்கள் மற்றும் நூல்களின் வெளிப்புற அட்டைப்படங்களை அடிப்படையாகக் கொண்டு, முழு நூல்களையும் தடுத்து வைப்பதன் மூலம், அரசாங்கத்தின் பொறுப்பற்ற செயற்பாடுகள் மற்றும் எழுத்தாளர்களுக்கு இழைக்கப்படும் அநீதியும் வெளிப்படுகின்றன. இவ்வாறு பொறுப்பற்ற முறையில், அநீதியான வகையில் நூல்களைத் தடுத்து வைக்கும் நடைமுறையானது, எழுத்துச் சுதந்திரத்தின் மீது அரசாங்கம் நேரடியாகச் தலையீடு செலுத்துவதனையே குறிக்கிறது.”
குறித்த நூல்கள் இலங்கையின் இறையாண்மைக்கு எதிரானவை என்றும், அவை பயங்கரவாதத்துக்கு ஆதரவளிப்பதாகக் கருதப்படுவதால் தடை செய்யப்பட்டுள்ளன என்றும் அரசாங்கமோ பாதுகாப்பு அமைச்சோ இதுவரை உத்தியோகபூர்வமாக அறிவிக்கவில்லை. எனினும், அந்த நூல்களை மீள பெறுவதற்கான எந்தவொரு நடைமுறையும் இல்லாத நிலையில், அவை காலவரையறையின்றி தடுத்து வைக்கப்பட்டுள்ளமை குறித்து கேள்வி எழுப்பும் எழுத்தாளர்கள், ஜனநாயக ரீதியான அரசாங்கமொன்றின் அடிப்படை ஒழுக்கநெறியானது, பேச்சுச் சுதந்திரத்தையும் எழுத்துச் சுதந்திரத்தையும் உறுதிப்படுத்துவதிலேயே தங்கியுள்ளது என எழுத்தாளர்கள் தமது கூட்டறிக்கையில் வலியுறுத்தியுள்ளனர்.
“சொற்களையும் எழுத்துக்களையும் சுதந்திரமாக வெளிப்படுத்துவதற்கு ஏற்ற சூழலை உருவாக்குவது அதன் முதன்மை பொறுப்பாகும். எந்தவொரு சந்தர்ப்பத்திலும் பொறுப்பற்ற முறையிலோ, அலட்சியமாகவோ அல்லது அவற்றை விடுவிப்பதற்கான வழிமுறைகள் எதுவுமின்றியோ நூல்களைத் தடுத்து வைத்திருக்கக் கூடாது.”
இந்த தடையானது ஒரு நிர்வாகத்தின் தவறு மாத்திரமல்ல, அரசாங்கத்தின் வழிகாட்டுதல்களுக்கு அமைய அதிகாரிகளால் மேற்கொள்ளப்படும் நடவடிக்கையாகும் என சுட்டிக்காட்டிய எழுத்தாளர்கள் குழு, இவ்வாறான சட்டவிரோத நடவடிக்கைகளுக்கான பொறுப்பை அரசாங்கம் ஏற்றுக்கொண்டு, தடுத்து வைக்கப்பட்டுள்ள நூல்களை உடனடியாக விடுவிக்கவும், எதிர்காலத்தில் இத்தகைய தடுத்துவைப்புகள் மீண்டும் இடம்பெறாமல் இருப்பதற்கும், மேலும் இந்த விடயத்தில் வெளிப்படைத்தன்மையுடனும் நியாயமான முறையிலும் அமைந்த நடைமுறையை உறுதிப்படுத்த இலங்கை அரசாங்கம் நடவடிக்கை எடுக்க வேண்டும் எனவும் தமது கூட்டறிக்கையில் வலியுறுத்தியுள்ளது.
