ஐரோப்பிய நாடான ரோமானியாவில் இலங்கையர் ஒருவர் செலுத்திச் சென்ற வேன் எதிர்த்திசையில் பயணித்து கார் ஒன்றுடன் மோதியதில் ஒன்பது பேர் காயமடைந்துள்ளனர்.
குறித்த விபத்துடன் தொடர்புடைய 35 வயதுடைய இலங்கையர் ஒருவர் அந்நாட்டு பொலிஸாரால் கைது செய்யப்பட்டுள்ளதாக வெளிநாட்டு ஊடகங்கள் செய்தி வெளியிட்டுள்ளன.
Navodari மற்றும் Lumina நகரங்களுக்கு இடையிலான வீதியில் கடந்த திங்கட்கிழமை காலை 6.50 மணியளவில் இந்த விபத்து இடம்பெற்றுள்ளது.
ஆரம்பகட்ட விசாரணைகளின்படி, கொன்ஸ்டன்டாவிலிருந்து Tulcea நோக்கி வேனைச் செலுத்திச் சென்ற இலங்கையர், வீதியின் வலதுபுற வளைவில் வாகனத்தின் கட்டுப்பாட்டை இழந்துள்ளார்.
இதன்போது, வேன் எதிர்த்திசையில் நுழைந்து 22 வயதுடைய பெண் ஒருவர் செலுத்தி வந்த கார் மீது மோதியுள்ளதாகத் தெரிவிக்கப்படுகிறது.
இந்த விபத்தில் 45 வயதுடைய ஆண் ஒருவர் பலத்த காயங்களுக்கு உள்ளாகியுள்ளார். மேலும், வேனைச் செலுத்திய இலங்கையர் உள்ளிட்ட அதில் பயணித்த இலங்கையர்கள் ஆறு பேரும், காரைச் செலுத்திய பெண்ணும் காயமடைந்துள்ளனர்.
இதேவேளை, விபத்தை ஏற்படுத்தியதாகக் கூறப்படும் இலங்கையரின் சாரதி அனுமதிப்பத்திரம் தற்காலிகமாக இடைநிறுத்தப்பட்டுள்ளதாக விசாரணைகளில் தெரியவந்துள்ளது.
சம்பவம் தொடர்பில் குற்றவியல் வழக்குப் பதிவு செய்துள்ள ரோமானிய பொலிஸார், விபத்துக்கான காரணங்களைக் கண்டறிய மேலதிக விசாரணைகளை முன்னெடுத்து வருகின்றனர்.
