பாகிஸ்தானின் தென்பகுதியிலுள்ள சிந்து மாகாணத்தில் அரச மருத்துவமனை ஒன்றில் நிறுத்தி வைக்கப்பட்டிருந்த நோயாளர் காவு வண்டியில் ஒட்சிசன் கொள்கலன் வெடித்ததில் 10 பேர் உயிரிழந்துள்ளனர்.
தாகர்பார்கர் மாவட்டத்தில் அமைந்துள்ள மருத்துவ நிலையத்தில் நேற்று இரவு இந்தத் துயரச் சம்பவம் இடம்பெற்றுள்ளதாக சர்வதேச ஊடகங்கள் செய்தி வெளியிட்டுள்ளன.
இந்த வெடிப்புச் சம்பவத்தில் மருத்துவமனை ஊழியர்கள், நோயாளர்கள் மற்றும் அவர்களது உறவினர்கள் உட்பட 10 பேர் உயிரிழந்துள்ளதாக மாவட்ட காவல்துறைத் தலைவர் அரிப் அசீஸ் தெரிவித்துள்ளார்.
நோயாளர்களை மற்றுமொரு மருத்துவமனைக்கு மாற்றுவதற்கான நடவடிக்கைகள் முன்னெடுக்கப்பட்டுக் கொண்டிருந்த சந்தர்ப்பத்திலேயே இந்த வெடிப்பு இடம்பெற்றதாக காவல்துறை அதிகாரி கலீல் அப்ரோ குறிப்பிட்டுள்ளார்.
இந்நிலையில், சம்பவம் தொடர்பில் கவலை வெளியிட்டுள்ள பாகிஸ்தான் ஜனாதிபதி ஆசிப் அலி சர்தாரி, வெடிப்புக்கான உண்மையான காரணத்தைக் கண்டறியும் வகையில் விரைவானதும் வெளிப்படையானதுமான விசாரணைகளை முன்னெடுக்குமாறு அதிகாரிகளுக்கு அறிவுறுத்தியுள்ளார்.
