ஏறாவூரில் பொது சுகாதாரப் பரிசோதகர் ஒருவரைப் பழிவாங்கும் நோக்கில், அவர் நிறுத்தி வைத்திருந்த மோட்டார் சைக்கிளில் ஐஸ் போதைப்பொருளை மறைத்து வைத்ததாகக் கூறப்படும் இருவரை ஏறாவூர் பொலிஸார் இன்று வெள்ளிக்கிழமை (30) கைது செய்துள்ளனர்.
ஏறாவூர் 4ஆம் பிரிவில் கடமையாற்றும் குறித்த பொது சுகாதாரப் பரிசோதகர், அப்பகுதியிலுள்ள உணவகங்களில் சுகாதாரப் பரிசோதனைகளை மேற்கொண்டு வந்துள்ளார். இதன்போது, சுகாதாரமற்ற உணவகம் ஒன்றுக்கு எதிராக நீதிமன்றில் வழக்குத் தாக்கல் செய்து சட்ட நடவடிக்கை எடுத்துள்ளார்.
இதனால் ஆத்திரமடைந்த குறித்த உணவக உரிமையாளர், பொது சுகாதாரப் பரிசோதகரைப் பொலிஸாரிடம் சிக்கவைத்து பழிவாங்கும் நோக்கில் இருவருக்கு பணம் வழங்கி இந்தச் செயலில் ஈடுபடுத்தியதாக பொலிஸாரின் ஆரம்பகட்ட விசாரணைகளில் தெரியவந்துள்ளது.
இதற்கமைய, கடந்த 26ஆம் திகதி ஏறாவூர் 4ஆம் பிரிவு பாடசாலை வீதியிலுள்ள தனது அலுவலகத்திற்கு முன்னால் பொது சுகாதாரப் பரிசோதகர் நிறுத்தி வைத்திருந்த மோட்டார் சைக்கிளில், மூன்று சிறிய பொதிகளில் ஐஸ் போதைப்பொருள் மறைத்து ஒட்டப்பட்டுள்ளது.
மோட்டார் சைக்கிளின் கீழ்ப்பகுதியில் ஒட்டப்பட்டிருந்த பொதிகளைக் கவனித்த பொது சுகாதாரப் பரிசோதகர், அவற்றைச் சோதித்துப் பார்த்த பின்னர் பொலிஸாருக்கு அறிவித்துள்ளார். பொலிஸார் மேற்கொண்ட பரிசோதனையில் அவை ஐஸ் போதைப்பொருள் என அடையாளம் காணப்பட்டுள்ளன.
இதனையடுத்து, அப்பகுதியில் பொருத்தப்பட்டிருந்த சி.சி.ரி.வி. கமரா காட்சிகளை ஆய்வு செய்த பொலிஸார், மோட்டார் சைக்கிளில் வந்து போதைப்பொருளை மறைத்து வைத்த இருவரையும் அடையாளம் கண்டு கைது செய்துள்ளனர்.
கைது செய்யப்பட்டவர்கள் ஏறாவூர் மீராகேணியைச் சேர்ந்த 46 வயதுடையவரும், ஏறாவூர் 6ஆம் பிரிவைச் சேர்ந்த 32 வயதுடையவரும் எனத் தெரிவிக்கப்பட்டுள்ளது. சம்பவத்திற்குப் பயன்படுத்தப்பட்ட மோட்டார் சைக்கிளும் பொலிஸாரால் மீட்கப்பட்டுள்ளதுடன் விசாரணையில் அவர்களிடம் உணவக உரிமையாளர் ஒருவர் பணம் வழங்கி செய்ய சொன்னதாக போலிசாரின் ஆரம்பக்கட்ட விசாரணையில் தெரியவந்துள்ளது.
குறித்த போதைப்பொருள் யாரிடமிருந்து பெறப்பட்டது உள்ளிட்ட பல்வேறு கோணங்களில் விசாரணைகள் முன்னெடுக்கப்பட்டு வருவதுடன், சந்தேகநபர்களை நீதிமன்றில் ஆஜர்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.
இச்சம்பவம் தொடர்பான மேலதிக விசாரணைகளை ஏறாவூர் பொலிஸார் மேற்கொண்டு வருகின்றனர்.
