கண்டி ஸ்ரீ தலதா மாளிகைக்கு முன்னால் காவியுடை அணிந்து, நாக உருவம் பொறிக்கப்பட்ட மரக்கைத்தடியை ஏந்தியவாறு ‘சிவுருக்கு நீதி’ என்ற தொனிப்பொருளில் நடைபயணத்தை ஆரம்பித்த நபர் தொடர்பில் சமூக ஊடகங்களில் பெரும் விவாதம் உருவாகியுள்ளது.
குறித்த நபர் உண்மையான பௌத்த பிக்கு அல்லர் என்றும், அவர் ஸ்ரீலங்கா பொதுஜன பெரமுன கட்சியைப் பிரதிநிதித்துவப்படுத்திய அம்பலாங்கொடை முன்னாள் நகர சபை உறுப்பினர் கிரேஷன் கெரமினியே என்றும் சமூக ஊடகங்களில் தகவல்கள் பகிரப்பட்டு வருகின்றன.
மேலும், இவர் கடந்த காலங்களில் ராஜபக்ச குடும்பத்தினருக்கு ஆதரவாக முன்னெடுக்கப்பட்ட பல்வேறு அரசியல் நடவடிக்கைகளில் பங்கேற்றதாகக் கூறப்படும் புகைப்படங்களும் தற்போது சமூக வலைத்தளங்களில் பரவலாகப் பகிரப்பட்டு வருகின்றன.
கடுகண்ணாவை பரமிதா பௌத்த நிலையத்திலிருந்து ஆரம்பித்து, கேகாலை ஊடாக கொழும்பைச் சென்றடையும் வகையில் இந்த நடைபயணம் திட்டமிடப்பட்டிருந்தது. அரசியல் கட்சி பேதங்களைக் கடந்து சிங்கள பௌத்த உணர்வுகளைக் கொண்ட அனைவரையும் ஒன்றிணைப்பதே இதன் நோக்கம் என நடைபயணத்தின் தேசிய அமைப்பாளர் முன்னதாகத் தெரிவித்திருந்தார்.
எனினும், நடைபயணம் ஆரம்பிக்கப்பட்டபோது சுமார் ஆறு பேர் மாத்திரமே அதில் கலந்துகொண்டிருந்ததாகத் தெரிவிக்கப்படுகிறது. இதன்போது ஊடகவியலாளர்கள் எழுப்பிய கேள்விகளுக்குப் பதிலளிக்க முடியாமல் குறித்த நபர் அதிருப்தியை வெளிப்படுத்தியதாகவும் தகவல்கள் வெளியாகியுள்ளன.
