இலங்கையில் தங்கியிருந்து இணையத்தளம் ஊடாக நிதி மோசடிகள் மற்றும் சட்டவிரோத ஒன்லைன் நடவடிக்கைகளில் ஈடுபட்டு வந்ததாகச் சந்தேகிக்கப்படும் 21 வெளிநாட்டவர்கள் கொழும்பு மருதானை பகுதியில் கைது செய்யப்பட்டுள்ளனர்.
மருதானை டெக்னிக்கல் சந்திக்கு அருகிலுள்ள மூன்று மாடிக் கட்டிடமொன்றில் முன்னெடுக்கப்பட்ட விசேட சோதனை நடவடிக்கையின்போதே இவர்கள் கைது செய்யப்பட்டுள்ளனர்.
பொலிஸ் மத்திய குற்றவியல் விசாரணைப் பணியகம், குற்றப் புலனாய்வுத் திணைக்களம் மற்றும் குடிவரவு குடியகல்வு திணைக்கள அதிகாரிகள் இணைந்து இந்த நடவடிக்கையை முன்னெடுத்துள்ளனர்.
கைது செய்யப்பட்டவர்களில் 12 சீனப் பிரஜைகள், 6 பங்களாதேஷ் பிரஜைகள் மற்றும் 3 இந்தியப் பிரஜைகள் உள்ளடங்குவதாகப் பொலிஸார் தெரிவித்துள்ளனர்.
குறித்த கட்டிடத்தைத் தளமாகக் கொண்டு முன்னெடுக்கப்பட்டதாகக் கூறப்படும் இணையவழி மோசடிகளின் பின்னணி, அதன் செயல்பாடுகள் மற்றும் தொடர்புடைய வலையமைப்புகள் குறித்து அதிகாரிகள் விரிவான விசாரணைகளை ஆரம்பித்துள்ளனர்.
பொலிஸ் மா அதிபர் பிரியந்த வீரசூரியவின் அறிவுறுத்தலுக்கு அமையவும், சிரேஷ்ட பிரதிப் பொலிஸ் மா அதிபர் ரன்மல் கொடித்துவக்கவின் வழிகாட்டுதலின் கீழும், சிரேஷ்ட பொலிஸ் அத்தியட்சகர் கமல் ஆரியவன்ச உள்ளிட்ட குழுவினர் மேலதிக விசாரணைகளை முன்னெடுத்து வருகின்றனர்.
