நுவரெலியா மாவட்டத்தின் ஹட்டன் நகரில் சில நாட்களாகத் தடைப்பட்டிருந்த லிட்ரோ சமையல் எரிவாயு விநியோகம் நேற்று (02.11.2026) மீண்டும் ஆரம்பிக்கப்பட்டுள்ளது.
இதனையடுத்து, எரிவாயுவைப் பெற்றுக்கொள்வதற்காகப் பொதுமக்கள் விநியோக நிலையங்களுக்கு முன்பாக நீண்ட வரிசைகளில் காத்திருந்ததாக எமது பிராந்திய செய்தியாளர் தெரிவித்துள்ளார்.
எனினும், போதியளவு எரிவாயு சிலிண்டர்கள் விநியோகிக்கப்படாமையால் பல நுகர்வோர் ஏமாற்றத்துடன் திரும்பிச் செல்ல நேரிட்டுள்ளது.
குறிப்பாக, விற்பனை நிலையங்களுக்கு நூறுக்கும் குறைவான எரிவாயு சிலிண்டர்களே நிறுவனத்தினால் வழங்கப்பட்டுள்ளதாக விற்பனையாளர்கள் தெரிவித்துள்ளனர்.
இதனால் வரிசையில் காத்திருந்த அனைத்து வாடிக்கையாளர்களுக்கும் எரிவாயுவை வழங்க முடியாத நிலை ஏற்பட்டுள்ளது.
நீண்ட நாட்களுக்குப் பின்னர் எரிவாயு விநியோகம் ஆரம்பிக்கப்பட்ட போதிலும், போதியளவு சிலிண்டர்கள் கிடைக்காமை ஹட்டன் பகுதி மக்களிடையே ஏமாற்றத்தை ஏற்படுத்தியுள்ளது.
