இலஞ்சம் பெற்றதாகக் கூறப்படும் குற்றச்சாட்டு தொடர்பில் விளக்கமறியலில் வைக்கப்பட்டிருந்த நாடாளுமன்ற உறுப்பினர் நாமல் ராஜபக்ஷவை கொழும்பு பிரதான நீதவான் இன்று (03) பிணையில் விடுவிக்க உத்தரவிட்டுள்ளார்.
நாமல் ராஜபக்ஷவின் பெற்றோர் இருவரும் கடுமையான நோயினால் பாதிக்கப்பட்டுள்ளமையை விசேட காரணியாகக் கருத்திற்கொண்டு, அவரைப் பிணையில் விடுவிக்குமாறு அவரது சட்டத்தரணிகள் நீதிமன்றத்தில் கோரிக்கை விடுத்திருந்தனர். எனினும், இதற்கு இலஞ்ச ஒழிப்பு ஆணைக்குழு எதிர்ப்புத் தெரிவித்திருந்தது.
இரு தரப்பு வாதங்களையும் பரிசீலித்த கொழும்பு பிரதான நீதவான் அஸங்க எஸ். போதரகம, அவரைப் பிணையில் விடுவிக்க உத்தரவிட்டார்.
கொழும்பு டிரான்ஸ்வேர்க் சதுக்கத்திலுள்ள காணியொன்றை இந்தியாவின் கிரிஷ் நிறுவனத்திற்கு பல்நோக்குத் திட்டத்திற்காக வழங்குவதற்கு உதவியதற்காக 70 மில்லியன் ரூபா இலஞ்சம் பெற்றதாகச் சந்தேகத்தின் பேரில் நாமல் ராஜபக்ஷ கைது செய்யப்பட்டு விளக்கமறியலில் வைக்கப்பட்டிருந்தார்.
