மட்டக்களப்பு மாவட்டத்தில் அதிகரித்து வரும் யானை – மனித மோதலைக் குறைக்கும் நோக்கில், மண்முனை மேற்கு – வவுணதீவு பிரதேச செயலகப் பிரிவுக்குட்பட்ட கற்பானை கிராமத்தில் 20,000 பனம் விதைகளை நடுகை செய்யும் விசேட திட்டம் ஆரம்பிக்கப்பட்டுள்ளது.
இதன் முதற்கட்டமாக 10,000 பனம் விதைகள் நேற்று வியாழக்கிழமை (05) கற்பானை பகுதியில் நடுகை செய்யப்பட்டுள்ளன.
மண்முனை மேற்கு பிரதேச செயலாளர் திருமதி சத்தியானந்தி நமசிவாயம் தலைமையில் நடைபெற்ற இந்த நிகழ்வில், மட்டக்களப்பு மாவட்ட செயலக ஊடகப் பிரிவின் பொறுப்பதிகாரி வ. ஜீவானந்தன் உள்ளிட்ட அரச அதிகாரிகள், ஊடகவியலாளர்கள் மற்றும் பொதுமக்கள் எனப் பலரும் கலந்துகொண்டனர்.
இதன்போது அரச அதிகாரிகள், ஊடகவியலாளர்கள் மற்றும் பொதுமக்கள் ஒன்றிணைந்து பனம் விதைகளை நடுகை செய்யும் பணியில் ஈடுபட்டனர்.
குறித்த திட்டத்திற்காக யாழ்ப்பாணத்திலிருந்து தரமான 20,000 பனம் விதைகள் கொண்டுவரப்பட்டுள்ளதுடன், அவற்றில் 10,000 விதைகள் முதற்கட்டமாக நடுகை செய்யப்பட்டுள்ளன. எஞ்சிய விதைகளையும் அடுத்த கட்டமாக நடுகை செய்வதற்கான நடவடிக்கைகள் முன்னெடுக்கப்பட்டுள்ளன.
அரசாங்க தகவல் திணைக்களத்தின் அனுசரணையுடன், மட்டக்களப்பு மாவட்ட அரசாங்க அதிபர் ஜே.எஸ். அருள்ராஜின் ஆலோசனை மற்றும் வழிகாட்டலின் கீழ் இச்செயற்றிட்டம் முன்னெடுக்கப்பட்டுள்ளது.
மாவட்ட செயலக ஊடகப் பிரிவினால் ஏற்பாடு செய்யப்பட்ட களப்பயணத்தின் ஒரு பகுதியாக, மாவட்ட ஊடகவியலாளர்கள் கற்பானை பகுதிக்கு நேரடியாகச் சென்று இத்திட்டத்தைப் பார்வையிட்டதுடன், நடுகைச் செயற்பாட்டிலும் பங்கேற்றனர்.
மட்டக்களப்பு மாவட்டத்தில் யானை – மனித மோதல் காரணமாக மக்கள் எதிர்கொள்ளும் பாதிப்புகளைக் குறைப்பதற்கும், சுற்றுச்சூழல் பாதுகாப்பை மேம்படுத்துவதற்கும் இத்தகைய திட்டங்கள் முக்கியத்துவம் வாய்ந்ததாகக் கருதப்படுகின்றன.
