இலங்கையில் கடந்த இரண்டு ஆண்டுகளில் முன்னெடுக்கப்பட்ட பொலிஸ் நடவடிக்கைகளின் போது மொத்தம் 4,056 துப்பாக்கிகள் மற்றும் ஏனைய ஆயுதங்கள் கைப்பற்றப்பட்டுள்ளதாக இலங்கை பொலிஸார் தெரிவித்துள்ளனர்.
கைப்பற்றப்பட்ட ஆயுதங்களில் 97 ரி-56 ரக துப்பாக்கிகள், ஒரு ஏ.கே-47 ரக துப்பாக்கி, 143 கைத்துப்பாக்கிகள், 105 ரிவோல்வர்கள் மற்றும் 397 ரக 12 போர் துப்பாக்கிகள் அடங்குவதாகப் பொலிஸார் குறிப்பிட்டுள்ளனர்.
இதற்கிடையில், கடந்த இரண்டு ஆண்டுகளில் போதைப்பொருள் தொடர்பாக மொத்தம் 597,964 சுற்றிவளைப்பு நடவடிக்கைகள் முன்னெடுக்கப்பட்டுள்ளதுடன், அவற்றின் மூலம் 596,591 சந்தேகநபர்கள் கைது செய்யப்பட்டுள்ளனர்.
இந்த நடவடிக்கைகளின்போது மொத்தம் 43,726 கிலோகிராம் போதைப்பொருட்கள் கைப்பற்றப்பட்டுள்ளன.
அவற்றில் 4,009 கிலோகிராம் ஹெரோயின், 6,526 கிலோகிராம் ஐஸ் எனப்படும் கிரிஸ்டல் மெத்தம்பெட்டமைன் மற்றும் 28,441 கிலோகிராம் கஞ்சா ஆகியவை முக்கியமானவையாகும்.
கைப்பற்றப்பட்ட போதைப்பொருட்களின் மொத்த மதிப்பு சுமார் 224 பில்லியன் ரூபா என மதிப்பிடப்பட்டுள்ளதாக பொலிஸார் மேலும் தெரிவித்துள்ளனர்.
கடந்த இரண்டு ஆண்டுகளில் முன்னெடுக்கப்பட்ட இந்த நடவடிக்கைகள், நாட்டில் சட்டவிரோத ஆயுதப் பாவனை மற்றும் போதைப்பொருள் கடத்தல், விநியோகத்தைக் கட்டுப்படுத்தும் பொலிஸாரின் நடவடிக்கைகளின் முக்கியத்துவத்தை வெளிப்படுத்துகின்றன.
