நாட்டில் வணிகப் பெயர்களைப் பதிவு செய்யும் நடைமுறையை இலகுவாக்கும் நோக்கில் அறிமுகப்படுத்தப்பட்டுள்ள எளிய மற்றும் ஒருங்கிணைந்த வணிகப் பெயர் பதிவு (BNR) முன்னோடித் திட்டம் அநுராதபுரத்தில் ஆரம்பித்து வைக்கப்பட்டுள்ளது.
கைத்தொழில் மற்றும் தொழில்முனைவோர் அபிவிருத்தி பிரதி அமைச்சர் சதுரங்க அபேசிங்க தலைமையில் இத்திட்டத்தின் ஆரம்ப நிகழ்வு நடைபெற்றது.
கைத்தொழில் மற்றும் தொழில்முனைவோர் அபிவிருத்தி அமைச்சு மற்றும் மாகாண சபைகளின் ஒத்துழைப்புடன் முன்னெடுக்கப்படும் இத்திட்டத்தின் மூலம் தனிநபர் மற்றும் பங்காண்மை வணிகங்களைப் பதிவு செய்யும் நடைமுறைகளை எளிமைப்படுத்தி, நாடளாவிய ரீதியில் ஒரே சீரான பதிவுக் கட்டமைப்பை உருவாக்க எதிர்பார்க்கப்படுகிறது.
1918ஆம் ஆண்டு முதல் நடைமுறையில் இருந்த பழைய பதிவு முறையில் காணி உரிமை தொடர்பான ஆவணங்கள் உள்ளிட்ட பல்வேறு ஆவணங்களையும் நிறுவனங்களின் அனுமதிகளையும் பெற்றுக்கொள்ள வேண்டியிருந்ததால், தொழில்முனைவோர் பல சிரமங்களை எதிர்கொண்டனர்.
எனினும், புதிய நடைமுறையின் கீழ் வணிகப் பெயர் பதிவு மற்றும் ஏனைய சட்டப்பூர்வ அனுமதிகளைப் பெறும் செயல்முறைகள் தனித்தனியாகப் பிரிக்கப்பட்டுள்ளன. இதன் மூலம் அடையாளச் சான்றுகள் மற்றும் வசிப்பிடத் தகவல்களை அடிப்படையாகக் கொண்டு ஐந்து நாட்களுக்குள் வணிகப் பதிவை நிறைவு செய்யும் வாய்ப்பை ஏற்படுத்த திட்டமிடப்பட்டுள்ளது.
இதன் ஆரம்பகட்டமாக மத்திய, வடக்கு, வடமத்திய மற்றும் வடமேல் மாகாணங்களைச் சேர்ந்த தெரிவுசெய்யப்பட்ட 20 பிரதேச செயலகப் பிரிவுகளில் மூன்று மாத கால முன்னோடித் திட்டம் நடைமுறைப்படுத்தப்படவுள்ளது.
இந்தத் திட்டத்தின் செயற்பாடுகள் மற்றும் முன்னேற்றங்கள் மதிப்பீடு செய்யப்பட்ட பின்னர், நாடு முழுவதும் இதனை விரிவுபடுத்துவதுடன், எதிர்காலத்தில் டிஜிட்டல் தொழில்நுட்பத்தின் ஊடாகவும் இச்சேவையை வழங்க நடவடிக்கை எடுக்கப்படவுள்ளது.
புதிய தொழில்களை ஆரம்பிக்க விரும்புவோர் மற்றும் சிறு, நடுத்தர தொழில்முனைவோர் எதிர்கொள்ளும் நிர்வாகச் சிக்கல்களைக் குறைத்து, அவர்கள் உத்தியோகபூர்வ பொருளாதாரக் கட்டமைப்பில் இலகுவாக இணைவதற்கான வாய்ப்பை ஏற்படுத்துவதே இத்திட்டத்தின் பிரதான நோக்கமாகும்.
