பிரான்ஸிலுள்ள பல்பொருள் அங்காடிகளின் குளிர்சாதனக் கட்டமைப்புகள் மீது நடத்தப்பட்ட சைபர் தாக்குதல்களுக்குப் பின்னால் ஈரானின் புரட்சிகர பாதுகாப்புப் படை (IRGC) இருப்பதாகப் பிரான்ஸ் குற்றம் சாட்டியுள்ளது.
கடந்த ஒக்டோபர் 11 மற்றும் 12ஆம் திகதிகளில் பிரான்ஸின் பல முக்கிய நகரங்களிலுள்ள பேரங்காடிகள் மீது இந்த இணையத் தாக்குதல்கள் நடத்தப்பட்டுள்ளன.
இதனால் அங்காடிகளின் குளிரூட்டும் கட்டமைப்புகள் முடக்கப்பட்டதுடன், குளிர்சாதனப் பெட்டிகளின் வெப்பநிலையும் திடீரென அதிகரித்துள்ளது. இதன் காரணமாகப் பழுதடையக்கூடிய பெருமளவிலான உணவுப் பொருட்களை அப்புறப்படுத்த வேண்டிய நிலை ஏற்பட்டதுடன், வர்த்தக நிலையங்களுக்கும் நிதி இழப்பு ஏற்பட்டுள்ளது.
இந்தத் தாக்குதல்கள் பிரான்ஸின் தேசிய நலன்களுக்கும் மக்களின் பாதுகாப்புக்கும் அச்சுறுத்தல் ஏற்படுத்தும் வகையில் திட்டமிட்டு நடத்தப்பட்டுள்ளதாக அந்நாட்டின் வெளிவிவகார அமைச்சு தெரிவித்துள்ளது.
இந்நிலையில், இந்தச் சைபர் தாக்குதல்களுக்குப் பதிலடியாக ஈரான் மீது ஐரோப்பிய ஒன்றியம் கடுமையான பொருளாதாரத் தடைகளை விதிக்க வேண்டுமெனப் பிரான்ஸ் வலியுறுத்தியுள்ளது.
எனினும், பிரான்ஸ் முன்வைத்துள்ள குற்றச்சாட்டுகள் தொடர்பில் ஈரான் அரசாங்கம் இதுவரை உத்தியோகபூர்வமாகப் பதிலளிக்கவில்லை.
