நெதர்லாந்தில் தொழில் வாய்ப்புகளைப் பெற்றுத் தருவதாகக் கூறி இலங்கையர்களை இலக்குவைத்து போலியான ஆட்சேர்ப்பு நடவடிக்கைகள் முன்னெடுக்கப்படுவதாக நெதர்லாந்து தூதரகம் எச்சரிக்கை விடுத்துள்ளது.
இந்த மோசடிகள் மூலம் ஏற்கனவே சிலர் பாதிக்கப்பட்டுள்ளதாகவும், நெதர்லாந்து குடிவரவு மற்றும் குடியகல்வு திணைக்களத்தின் பெயரில் போலியான ஆவணங்கள் மற்றும் கடிதங்கள் பயன்படுத்தப்படுவதாகவும் தூதரகம் சுட்டிக்காட்டியுள்ளது.
இது தொடர்பில் வெளியிடப்பட்டுள்ள அறிக்கையில், இலங்கையர்களுக்கு நெதர்லாந்து வேலை விசாக்கள் வழங்கப்படுவதாகக் கூறப்படும் தகவல்கள் போலியானவை எனத் தெரிவிக்கப்பட்டுள்ளது.
மேலும், நெதர்லாந்தில் விசேட திறன்களைக் கொண்டவர்கள் மற்றும் உயர் தொழில்நுட்பத் துறைகளில் நிபுணத்துவம் பெற்றவர்களுக்கான வேலைவாய்ப்புகள் தொடர்பான நடைமுறைகள் தனித்துவமானவை என்றும் குறிப்பிடப்பட்டுள்ளது.
எனவே, வெளிநாட்டு வேலைவாய்ப்புகளைப் பெற்றுக்கொடுப்பதாகக் கூறி தனிநபர்களோ அல்லது நிறுவனங்களோ பணம் கோரினால், பணம் செலுத்துவதற்கு முன்னர் அதன் உண்மைத்தன்மையை உறுதிப்படுத்திக்கொள்ளுமாறு தூதரகம் பொதுமக்களிடம் கேட்டுக்கொண்டுள்ளது.
அத்துடன், நெதர்லாந்தில் வேலைவாய்ப்புகளைப் பெற்றுத் தருவதாகக் கூறி மோசடியில் ஈடுபடும் நபர்கள் தொடர்பில் உரிய அதிகாரிகளிடம் முறைப்பாடு செய்யுமாறும் இலங்கையர்களுக்கு அறிவுறுத்தப்பட்டுள்ளது.
