யாழ்ப்பாணம், சாவகச்சேரி பகுதியில் சொகுசு காரில் வாள் உள்ளிட்ட கூரிய ஆயுதங்களுடன் பயணித்த இருவரையும் எதிர்வரும் 14 நாட்களுக்கு விளக்கமறியலில் வைக்க நீதிமன்றம் உத்தரவிட்டுள்ளது.
சாவகச்சேரி நீதவான் நீதிமன்றம் நேற்று (12.11.2026) இந்த உத்தரவைப் பிறப்பித்துள்ளது.
சம்பவம் தொடர்பில் தெரியவருவதாவது,
சாவகச்சேரி பகுதியில் வீதிச் சோதனை நடவடிக்கையில் ஈடுபட்டிருந்த காவல்துறையினர், சந்தேகத்திற்கிடமான முறையில் பயணித்த பென்ஸ் ரக சொகுசு காரை வழிமறித்து சோதனையிட்டுள்ளனர்.
இதன்போது காருக்குள் வாள் உள்ளிட்ட கூரிய ஆயுதங்கள் மீட்கப்பட்டுள்ளன.
இதனையடுத்து, காரில் பயணித்த இருவரையும் கைது செய்த காவல்துறையினர், மேலதிக விசாரணைகளின் பின்னர் நீதிமன்றில் முன்னிலைப்படுத்தியுள்ளனர்.
இதன்போது சந்தேகநபர்கள் இருவரையும் 14 நாட்கள் விளக்கமறியலில் வைக்க நீதவான் உத்தரவிட்டுள்ளார்.
மேலும், குறித்த சொகுசு காரும் அதற்குள் மீட்கப்பட்ட பொருட்களும் சான்றுப் பொருட்களாக நீதிமன்றில் ஒப்படைக்கப்பட்டுள்ளதுடன், அவற்றை நீதிமன்றக் கட்டுப்பாட்டில் வைக்கவும் உத்தரவிடப்பட்டுள்ளது.
இதேவேளை, குறித்த பென்ஸ் ரக கார் இளவாலைப் பகுதியைச் சேர்ந்த பெண்ணொருவருக்குச் சொந்தமானது எனவும், அவர் நாளொன்றுக்கு 8,000 ரூபா வாடகை அடிப்படையில் சந்தேகநபர்களுக்கு காரை வழங்கியதாகவும் தெரிவிக்கப்படுகிறது.
காரின் உரிமையாளர் மற்றும் அதன் பயன்பாடு தொடர்பில் காவல்துறையினர் மேலதிக விசாரணைகளை முன்னெடுத்து வருகின்றனர்.
