நாட்டு மக்கள் எதிர்நோக்கும் அடிப்படைப் பொருளாதார மற்றும் சமூகப் பிரச்சினைகளுக்குத் தீர்வுகளை வழங்கும் வகையில் 2027ஆம் ஆண்டுக்கான வரவு செலவுத் திட்டம் அமையவில்லை என எதிர்க்கட்சித் தலைவர் சஜித் பிரேமதாச தெரிவித்துள்ளார்.
ஜனாதிபதி அநுரகுமார திஸாநாயக்கவினால் வியாழக்கிழமை (12) நாடாளுமன்றத்தில் சமர்ப்பிக்கப்பட்ட வரவு செலவுத் திட்டம் தொடர்பில் ஊடகங்களுக்குக் கருத்துத் தெரிவிக்கும்போதே அவர் இதனைத் குறிப்பிட்டுள்ளார்.
இதன்போது மேலும் கருத்துத் தெரிவித்த அவர்,
ஜனாதிபதி நீண்ட உரையொன்றை நிகழ்த்தி பல்வேறு திட்டங்களையும் முன்மொழிவுகளையும் முன்வைத்துள்ளார். எனினும், அவற்றில் பல கடந்த 2026ஆம் ஆண்டுக்கான வரவு செலவுத் திட்டத்திலும் குறிப்பிடப்பட்டிருந்ததாக அவர் சுட்டிக்காட்டினார்.
கடந்த ஆண்டு முன்வைக்கப்பட்ட பல்வேறு முன்மொழிவுகள் இதுவரையில் நடைமுறைப்படுத்தப்படாத நிலையில், தற்போதைய வரவு செலவுத் திட்டத்திலும் அதே நிலைமை தொடர்வதாக அவர் விமர்சித்தார்.
மேலும், வறுமை மற்றும் வேலையின்மை உள்ளிட்ட மக்கள் எதிர்கொள்ளும் முக்கிய பிரச்சினைகளுக்குத் தீர்வுகளை முன்வைக்க அரசாங்கம் தவறியுள்ளதாகவும் அவர் குற்றஞ்சாட்டினார்.
மக்களின் பிரச்சினைகள் குறித்து நீண்ட நேரம் உரையாற்றும் ஜனாதிபதி, அவற்றுக்கான நடைமுறைச் சாத்தியமான தீர்வுகளை வரவு செலவுத் திட்டத்தில் முன்வைக்கவில்லை எனவும் அவர் தெரிவித்தார்.
எனவே, தற்போதைய வரவு செலவுத் திட்டத்தில் முன்வைக்கப்பட்டுள்ள திட்டங்கள் வெறும் மாயாஜாலமாகவே காணப்படுவதாகக் குறிப்பிட்ட சஜித் பிரேமதாச, இந்த வரவு செலவுத் திட்டத்தின் ஊடாக தமக்குக் கிடைத்துள்ள நன்மைகள் என்ன என்பதை மக்கள் சிந்தித்துப் பார்க்க வேண்டும் என்றும் வலியுறுத்தினார்.
