இரத்தினபுரி மாவட்டத்தின் கஹவத்தை ஆதார வைத்தியசாலையில் இன்று (17) அதிகாலை தீ விபத்தொன்று ஏற்பட்டுள்ளதாக பொலிஸார் தெரிவித்துள்ளனர்.
வைத்தியசாலையின் பழைய கட்டடமொன்றில் அதிகாலை 3.45 மணியளவில் இந்தத் தீ பரவியுள்ளது.
குறித்த கட்டடம் தற்போது பயன்பாட்டில் இல்லாததுடன், பழைய பொருட்கள் களஞ்சியப்படுத்தப்பட்டு மூடப்பட்ட நிலையில் காணப்பட்டதாக தெரிவிக்கப்படுகிறது.
தீயைக் கட்டுப்படுத்துவதற்காக வைத்தியசாலை நிர்வாகத்தினர் மேற்கொண்ட நடவடிக்கைகளுடன், இரத்தினபுரி நகர தீயணைப்புப் பிரிவினரும் அழைக்கப்பட்டுள்ளனர்.
ஒரு மணித்தியாலத்திற்கும் மேலாகத் தீயணைப்பு நடவடிக்கைகள் முன்னெடுக்கப்பட்ட நிலையில், தற்போது தீ முழுமையாகக் கட்டுப்பாட்டுக்குள் கொண்டுவரப்பட்டுள்ளதாக பொலிஸார் தெரிவித்துள்ளனர்.
தீ பரவிய கட்டடம் முன்னர் உள்நோயாளர் விடுதியாகப் பயன்படுத்தப்பட்டு வந்துள்ளது. பின்னர் புதிய கட்டடம் நிர்மாணிக்கப்பட்டதைத் தொடர்ந்து, நோயாளர் விடுதி அங்கு மாற்றப்பட்டதாகவும் குறிப்பிடப்பட்டுள்ளது.
இந்தத் தீ விபத்தில் எவருக்கும் காயங்களோ உயிரிழப்புகளோ ஏற்படவில்லை என தெரிவிக்கப்பட்டுள்ளது.
மின்சாரக் கசிவு காரணமாகத் தீ ஏற்பட்டிருக்கலாம் என ஆரம்பகட்ட சந்தேகம் வெளியிடப்பட்டுள்ளதுடன், சம்பவம் தொடர்பான மேலதிக விசாரணைகள் முன்னெடுக்கப்பட்டு வருகின்றன.







