இலங்கையின் வடக்கு மற்றும் வடமத்திய மாகாணப் பாடசாலைகளில் ஆங்கில மொழிக் கல்வியை மேம்படுத்தும் நோக்கில், அமெரிக்க அமைதிப் படையைச் (Peace Corps) சேர்ந்த 34 தன்னார்வத் தொண்டர்கள் தமது இரண்டு வருடகால சேவையை இலங்கையில் ஆரம்பித்துள்ளனர்.
இதற்கான சேவை உறுதிமொழி ஏற்பு நிகழ்வு நேற்று முன் தினம் (17) நடைபெற்றதுடன், இதில் வெளிநாட்டு அலுவல்கள் மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திர கலந்துகொண்டார்.
இலங்கைக்கான அமெரிக்கத் தூதுவர் எரிக் மேயர் மற்றும் கல்வி அமைச்சின் சிரேஷ்ட அதிகாரிகளும் இந்நிகழ்வில் பங்கேற்றனர்.
2018ஆம் ஆண்டு இத்திட்டம் மீண்டும் ஆரம்பிக்கப்பட்டதன் பின்னர் இலங்கைக்கு வருகை தந்துள்ள மிகப்பெரிய அமெரிக்க அமைதிப் படைத் தன்னார்வலர் குழு இதுவாகும்.
இவர்கள் இலங்கை ஆசிரியர்களுடன் இணைந்து வகுப்பறைக் கற்பித்தல் மற்றும் ஆசிரியர் பயிற்சித் திட்டங்களில் ஈடுபடவுள்ளதுடன், மாணவர்களின் ஆங்கில மொழித் தொடர்பாடல் திறனை மேம்படுத்துவதற்கும் பங்களிப்பு வழங்கவுள்ளனர்.
நிகழ்வில் உரையாற்றிய பிரதி அமைச்சர் அருண் ஹேமச்சந்திர, கல்விசார் ஒத்துழைப்பு மற்றும் மக்களிடையிலான உறவுகளை வலுப்படுத்துவது இரு நாடுகளுக்கும் இடையிலான நட்புறவை மேம்படுத்துவதில் முக்கிய பங்கு வகிப்பதாகத் தெரிவித்தார்.
மேலும், இராஜதந்திர உறவுகள் பேச்சுவார்த்தை மேசைகளில் மட்டுமன்றி, சில நேரங்களில் வகுப்பறைகளிலும் ஆரம்பிக்க முடியும் என அவர் குறிப்பிட்டார்.
அத்துடன், இலங்கைக்கான அமைதிப் படைத் திட்டத்தின் பணிப்பாளர் ஜெஃப்ரி கோவியா உள்ளிட்ட குழுவினரின் அர்ப்பணிப்பையும் அவர் பாராட்டினார்.
இந்தத் திட்டத்தின் ஊடாக இலங்கை மற்றும் அமெரிக்காவுக்கு இடையிலான கல்விசார் ஒத்துழைப்பு, கலாசாரப் பரிமாற்றம் மற்றும் மக்களிடையிலான தொடர்புகள் மேலும் வலுப்பெறும் என எதிர்பார்க்கப்படுகிறது.








