இலங்கையில் அதிகரித்து வரும் பணவீக்கத்தைக் கட்டுப்படுத்தும் நோக்கில், கொள்கை வட்டி வீதத்தை உயர்த்துவதற்கு இலங்கை மத்திய வங்கி தீர்மானித்துள்ளது.
நேற்று (24) நடைபெற்ற நாணயக் கொள்கைச் சபைக் கூட்டத்தில் இந்தத் தீர்மானம் எடுக்கப்பட்டுள்ளதாக மத்திய வங்கி அறிவித்துள்ளது.
இதன்படி, ஒரிரவு கொள்கை வட்டி வீதத்தை (OPR) 25 அடிப்படைப் புள்ளிகளால் அதிகரித்து 9 சதவீதமாக நிர்ணயிக்க முடிவு செய்யப்பட்டுள்ளது.
உள்நாட்டு மற்றும் சர்வதேச பொருளாதார நிலைமைகள் மற்றும் எதிர்காலப் போக்குகளை விரிவாக ஆராய்ந்த பின்னரே இந்தத் தீர்மானம் எடுக்கப்பட்டுள்ளதாக மத்திய வங்கி வெளியிட்டுள்ள அறிக்கையில் குறிப்பிடப்பட்டுள்ளது.
குறிப்பாக, மத்திய கிழக்கில் நீடித்து வரும் மோதல்கள் எதிர்பார்த்ததை விட நீண்டகாலமாகத் தொடர்வதுடன், உலகளாவிய எரிசக்தி மற்றும் உணவுப் பொருட்களின் விலைகளும் அதிகரித்து வருகின்றன.
இதன் தாக்கமாக இலங்கையிலும் பணவீக்க அழுத்தம் அதிகரித்துள்ளதுடன், 2026 ஒக்டோபர் மாதத்தில் ஆண்டுக்கு ஆண்டு பணவீக்கம் 8.3 சதவீதமாக உயர்ந்துள்ளதாக மத்திய வங்கி சுட்டிக்காட்டியுள்ளது.
குறுகிய காலத்தில் பணவீக்கம் மேலும் உயர்வாகக் காணப்படக்கூடும் என எதிர்பார்க்கப்படுவதால், பணவீக்க எதிர்பார்ப்புகள் நிர்ணயிக்கப்பட்ட இலக்கிலிருந்து விலகுவதைத் தடுக்கும் வகையில் நாணயக் கொள்கையை மேலும் இறுக்கமாக்க வேண்டிய அவசியம் ஏற்பட்டுள்ளதாக நாணயக் கொள்கைச் சபை தெரிவித்துள்ளது.
உள்நாட்டு விலை ஸ்திரத்தன்மையைப் பாதுகாப்பதையும், பணவீக்கத்தைக் கட்டுப்படுத்துவதையும் நோக்கமாகக் கொண்டே கொள்கை வட்டி வீதத்தை அதிகரிக்கும் இந்த நடவடிக்கை மேற்கொள்ளப்பட்டுள்ளதாக இலங்கை மத்திய வங்கி மேலும் தெரிவித்துள்ளது.








