யாழ்ப்பாணப் பல்கலைக்கழக முகாமைத்துவப் பீட மாணவர்களுக்கிடையில் இடம்பெற்ற மோதல் சம்பவம் தொடர்பில் கைது செய்யப்பட்ட 21 மாணவர்களையும் எதிர்வரும் 26ஆம் திகதி வரை விளக்கமறியலில் வைக்குமாறு யாழ்ப்பாணம் நீதவான் நீதிமன்றம் உத்தரவிட்டுள்ளது.
கோப்பாய் பொலிஸாரால் கைது செய்யப்பட்ட மாணவர்கள் நீதிமன்றத்தில் முன்னிலைப்படுத்தப்பட்டபோதே இந்த உத்தரவு பிறப்பிக்கப்பட்டுள்ளது. மேலும், சம்பவத்துடன் தொடர்புடைய ஏனைய மாணவர்களையும் கைது செய்வதற்கான நடவடிக்கைகள் முன்னெடுக்கப்பட்டுள்ளதாகப் பொலிஸார் தெரிவித்துள்ளனர்.
கடந்த 19ஆம் திகதி இரவு, மாணவர்கள் தங்கியிருந்த தனியார் விடுதியொன்றில் முகாமைத்துவப் பீடத்தின் இரண்டாம் மற்றும் மூன்றாம் வருட மாணவர் குழுக்களுக்கு இடையில் இந்த மோதல் இடம்பெற்றுள்ளது. இதில் காயமடைந்த மாணவர்கள் யாழ்ப்பாணம் போதனா வைத்தியசாலையில் அனுமதிக்கப்பட்டுள்ளனர்.
இதேவேளை, இச்சம்பவம் தொடர்பில் பொலிஸ் விசாரணைகளுக்கு மேலதிகமாகப் பல்கலைக்கழக நிர்வாகமும் உள்ளக விசாரணையை ஆரம்பித்துள்ளது.
பல்கலைக்கழகத்தின் துணைவேந்தர் சிரேஷ்ட பேராசிரியர் திருநாவுக்கரசு வேல்நம்பி இதனைத் தெரிவித்துள்ளார்.
மோதல் பல்கலைக்கழக வளாகத்திற்கு வெளியே இடம்பெற்றிருந்தாலும், பொலிஸாரின் விசாரணைகளுக்கு முழுமையான ஒத்துழைப்பு வழங்கப்படும் எனக் குறிப்பிட்ட அவர், மோதலுக்கான காரணங்களைக் கண்டறிந்து எதிர்காலத்தில் இவ்வாறான சம்பவங்கள் இடம்பெறாமல் தடுப்பதற்கான நடவடிக்கைகள் எடுக்கப்படும் என்றும் தெரிவித்துள்ளார்.







