அரசு அதிகாரிகளிடையே குறிப்பிடத்தக்க தயக்கமும் பயமும் உள்ளது. இந்த நெருக்கடியான சூழலில் பொதுமக்களுக்கு பணி செய்ய வேண்டுமெனில் அந்த தயக்கத்தை உடைக்க வேண்டும் என மனோ கணேசன் தெரிவித்துள்ளார்.
இது தொடர்பில் தெரிவித்த மனோ கணேசன்,
அகுரேகொட முப்படை தலைமையகத்தில் அரசாங்கம், எதிர் கட்சிகளின் தலைவர்கள் கூட்டத்தை நடத்தியது.
எதிர்க்கட்சிகளின் தலைவர்கள் அனைவரும் ஒருமனதாக ஜனாதிபதியிடம் அவசரநிலையை அறிவிக்க வேண்டுமென வலியுறுத்தினோம்.
எங்கள் நோக்கம் தெளிவாக உள்ளது. மாவட்ட மற்றும் பிரதேச செயலாளர்கள், நிவாரணம் வழங்க வேண்டிய அதிகாரம் கொண்டவர்கள். ஆனால், சட்டத்தை மீறி, நாம் சிக்கலில் விழுந்து விடுவோமா என இன்று தயங்கி நிற்கிறார்கள்.
தரை மட்டத்தில் மக்களுக்கான நிவாரணம் வழங்கும் அந்தஸ்த்தில், முடிவெடுத்து செயல்பட வேண்டிய முன்னணி நிர்வாகிகளான அவர்களுக்கு, அவசரகால அதிகாரங்களை வழங்குங்கள்.
ஆகவே, அவசரநிலை சட்டத்தை ஜனாதிபதி பிரகடனம் செய்ய வேண்டும் என தெரிவித்தார்.
