கடந்த ஆண்டு ஜூன் மாதத்துடன் ஒப்பிடுகையில், இவ்வாண்டு ஜூன் மாதத்தில் இலங்கைக்கு வருகை தந்த வெளிநாட்டு சுற்றுலாப் பயணிகளின் எண்ணிக்கை 9.9 சதவீதம் குறைந்துள்ளதாக இலங்கை சுற்றுலா அபிவிருத்தி அதிகார சபை தெரிவித்துள்ளது.
அதன்படி, 2026 ஜூன் மாதத்தில் மொத்தம் 138,241 வெளிநாட்டு சுற்றுலாப் பயணிகள் நாட்டிற்கு வருகை தந்துள்ளனர்.
அவர்களில் 43,423 பேர் இந்தியாவைச் சேர்ந்தவர்களாகும். இது ஜூன் மாதத்தில் பதிவான மொத்த சுற்றுலாப் பயணிகளின் வருகையில் சுமார் 35 சதவீதமாகும்.
மேலும், பிரித்தானியாவிலிருந்து 10,474 பேரும், அவுஸ்திரேலியாவிலிருந்து 8,710 பேரும், சீனாவிலிருந்து 8,224 பேரும், அமெரிக்காவிலிருந்து 3,806 பேரும் கடந்த மாதத்தில் இலங்கைக்கு வருகை தந்துள்ளதாக அதிகார சபை தெரிவித்துள்ளது.
மே மாதத்தில் 145,745 சுற்றுலாப் பயணிகள் நாட்டிற்கு வந்திருந்த நிலையில், இவ்வாண்டின் இதுவரையான காலப்பகுதியில் இலங்கைக்கு வருகை தந்த மொத்த வெளிநாட்டு சுற்றுலாப் பயணிகளின் எண்ணிக்கை 1,146,573 ஆக உயர்ந்துள்ளது.
இந்த ஆண்டின் மொத்த வருகையாளர்களில் 293,683 பேர் இந்தியாவிலிருந்தும், 108,567 பேர் ஐக்கிய இராச்சியத்திலிருந்தும், 77,349 பேர் ரஷ்யாவிலிருந்தும், 76,171 பேர் சீனாவிலிருந்தும் வருகை தந்துள்ளதாக இலங்கை சுற்றுலா அபிவிருத்தி அதிகார சபை மேலும் தெரிவித்துள்ளது.
