உலகளவில் அதிக போக்குவரத்து நெரிசல் காணப்படும் நாடுகளின் பட்டியலில் இலங்கை மூன்றாவது இடத்தைப் பெற்றுள்ளதுடன், ஆசிய நாடுகளில் முதலிடத்தில் இருப்பதாக புதிய அறிக்கையொன்று தெரிவிக்கிறது.
உலகின் வாழ்க்கைச் செலவு மற்றும் வாழ்க்கைத்தரம் தொடர்பான தரவுகளை வெளியிடும் Numbeo இணையதளத்தின் 2026ஆம் ஆண்டின் நடுப்பகுதிக்கான Traffic Index அறிக்கையில் இந்த தகவல் வெளியாகியுள்ளது.
அறிக்கையின்படி, உலகின் அதிக போக்குவரத்து நெரிசல் கொண்ட நாடாக நைஜீரியா முதலிடத்திலும், கோஸ்டாரிகா இரண்டாவது இடத்திலும் இடம்பெற்றுள்ளன. அதனைத் தொடர்ந்து இலங்கை மூன்றாவது இடத்தில் தரவரிசைப் பெற்றுள்ளது.
மறுபுறம், உலகின் மிகக் குறைந்த போக்குவரத்து நெரிசல் கொண்ட நாடாக எஸ்தோனியா தெரிவு செய்யப்பட்டுள்ளதுடன், ஒஸ்திரியா மற்றும் பின்லாந்தும் குறைந்த நெரிசல் கொண்ட நாடுகளின் பட்டியலில் இடம்பெற்றுள்ளன.
பயண நேரம், எரிபொருள் நுகர்வு, போக்குவரத்து நெரிசலால் ஏற்படும் மன அழுத்தம், கார்பன் டைஒக்சைடு (CO₂) வெளியேற்றம் மற்றும் போக்குவரத்து அமைப்பின் செயல்திறன் உள்ளிட்ட பல்வேறு காரணிகளை அடிப்படையாகக் கொண்டு இந்த தரவரிசை தயாரிக்கப்பட்டுள்ளதாக அந்த அறிக்கையில் குறிப்பிடப்பட்டுள்ளது.
இந்தக் குறியீடு, ஒவ்வொரு நாட்டின் போக்குவரத்து அமைப்பின் செயல்திறன் மற்றும் சாலை நெரிசலின் தாக்கத்தை மதிப்பிடும் முக்கியமான அளவுகோலாகக் கருதப்படுகிறது.
