2019ஆம் ஆண்டு இடம்பெற்ற உயிர்த்த ஞாயிறு பயங்கரவாதத் தாக்குதல் சம்பவம் தொடர்பாக சதித்திட்டம் தீட்டியமை மற்றும் அதற்கு உடந்தையாக இருந்தமை உள்ளிட்ட 23,270க்கும் அதிகமான குற்றச்சாட்டுகளின் கீழ் 24 பிரதிவாதிகளுக்கு எதிராகத் தொடரப்பட்ட வழக்கின் தீர்ப்பு இன்று அறிவிக்கப்பட்டு வருகிறது.
கொழும்பு நிரந்தர மூவரடங்கிய மேல் நீதிமன்ற நீதிபதிகள் குழாம் முன்னிலையில் இந்த வழக்கின் தீர்ப்பு அறிவிக்கப்பட்டுள்ளது.
நவரத்ன மாரசிங்க, ராமநாதன் கண்ணன் மற்றும் சுஜீவ நிஸ்சங்க ஆகிய நீதிபதிகள் அடங்கிய குழாமினால் தீர்ப்பு வழங்கப்படுகிறது.
இதன்படி, 24 பிரதிவாதிகளில் 15 பேர் குற்றவாளிகளாக அறிவிக்கப்பட்டுள்ளதுடன், ஏனைய 9 பிரதிவாதிகளும் அவர்களுக்கு எதிராக சுமத்தப்பட்ட அனைத்து குற்றச்சாட்டுகளில் இருந்தும் விடுவிக்கப்பட்டு விடுதலை செய்ய நீதிமன்றம் உத்தரவிட்டுள்ளது.
குற்றவாளிகளாக அறிவிக்கப்பட்டுள்ள 15 பேருக்குமான தண்டனை விபரங்கள் இன்று (22) அறிவிக்கப்படவுள்ளன.
நௌஃபர் மௌலவி உள்ளிட்ட பிரதிவாதிகளுக்கு எதிராக சட்டமா அதிபரால் இந்த வழக்கு தாக்கல் செய்யப்பட்டிருந்தது. சதித்திட்டம் தீட்டியமை, அதற்கு உடந்தையாக இருந்தமை உள்ளிட்ட 23,270க்கும் அதிகமான குற்றச்சாட்டுகள் அவர்களுக்கு எதிராக முன்வைக்கப்பட்டிருந்தன.
இந்த வழக்கில் மொத்தம் 2,309 சாட்சிகள் சாட்சியமளித்திருந்த நிலையில், கடந்த ஆகஸ்ட் 24ஆம் திகதி சாட்சிய விசாரணைகள் முழுமையாக நிறைவடைந்தன.
தீர்ப்பு அறிவிக்கப்படுவதையொட்டி, அசம்பாவிதங்களைத் தடுக்கும் வகையில் புதுக்கடை நீதிமன்ற வளாகத்தைச் சுற்றி பல விசேட பொலிஸ் குழுக்கள் பாதுகாப்புப் பணிகளில் ஈடுபடுத்தப்பட்டிருந்ததுடன், பலத்த பாதுகாப்பும் ஏற்படுத்தப்பட்டிருந்தது.
