யாழ்ப்பாணம் நல்லூர் பகுதியில் அமைக்கப்பட்டிருந்த உயிர்நீத்த திலீபனின் உருவச்சிலை இன்று (27) காலை காவல்துறையினரால் அகற்றப்பட்டதாக தெரிவிக்கப்பட்டுள்ளது.
காலை சுமார் 6.30 மணியளவில் காவல்துறையினர் அப்பகுதிக்கு சென்று உருவச்சிலையை அகற்றி எடுத்துச் சென்றதாக கூறப்படுகிறது. திலீபனின் நினைவேந்தல் நிகழ்வுகள் நேற்று (26) இடம்பெற்றிருந்த நிலையில், அதற்கு மறுநாளே இந்த நடவடிக்கை மேற்கொள்ளப்பட்டுள்ளது.
எவ்வித முன்னறிவிப்பும் இன்றி காவல்துறையினர் வருகை தந்து உருவச்சிலையை அகற்றியதாக தமிழ் தேசிய மக்கள் முன்னணியின் பொதுச் செயலாளர் செல்வராஜா கஜேந்திரன் குற்றம் சாட்டியுள்ளார். காவல்துறையின் இந்த நடவடிக்கைக்கு அவர் கண்டனம் தெரிவித்துள்ளார்.
எனினும், காவல்துறைக்கு கிடைத்த முறைப்பாட்டின் அடிப்படையிலேயே உருவச்சிலை அகற்றப்பட்டதாக காவல்துறை ஊடகப் பேச்சாளர் எஃப்.யூ. வூட்லர் தெரிவித்துள்ளார்.
தடை செய்யப்பட்ட அமைப்பின் உறுப்பினர் ஒருவரை நினைவுகூரும் வகையில் ‘எல்லான் படை’ என்ற குழு செயற்படுவதாக கிடைத்த முறைப்பாட்டைத் தொடர்ந்து இந்த நடவடிக்கை மேற்கொள்ளப்பட்டதாக காவல்துறை தெரிவித்துள்ளது. மேலும், இனங்களுக்கிடையிலான நல்லிணக்கத்தைப் பாதுகாப்பதற்கும், யுத்த மனநிலையை உருவாக்கக்கூடிய சூழ்நிலைகளைத் தடுப்பதற்கும் உருவச்சிலை அகற்றப்பட்டதாகவும் காவல்துறை தரப்பு விளக்கமளித்துள்ளது.
இந்த விவகாரம் தொடர்பாக காவல்துறையினர் யாழ்ப்பாணம் நீதவான் நீதிமன்றத்தில் விளக்கமளித்துள்ளதாகவும், வழக்கின் அடுத்த விசாரணை ஒக்டோபர் 2ஆம் திகதி நடைபெறவுள்ளதாகவும் தெரிவிக்கப்பட்டுள்ளது.
இதனிடையே, திலீபனின் நினைவேந்தல் நிகழ்வுகளை நடத்துவதற்கு யாழ்ப்பாண மாநகர சபையினால் நேற்று வரை அனுமதி வழங்கப்பட்டிருந்ததாக காவல்துறை ஊடகப் பிரிவு தெரிவித்துள்ளது.
