நல்லூரில் தியாகி திலீபனின் சிலை அகற்றப்பட்டமைக்கு தானோ அல்லது தமிழரசுக் கட்சியோ காரணமல்ல என அக்கட்சியின் தலைவரும் வடமாகாண சபையின் அவைத் தலைவருமான சி.வி.கே. சிவஞானம் தெரிவித்துள்ளார்.
யாழ்ப்பாணத்தில் நேற்று நடைபெற்ற ஊடகவியலாளர் சந்திப்பில் கருத்துத் தெரிவித்த அவர், திலீபனின் சிலை அகற்றப்பட்டமைக்கு தமிழரசுக் கட்சியும் அதன் தலைமையும் காரணம் என தமிழ் தேசிய மக்கள் முன்னணியின் செயலாளர் செல்வராசா கஜேந்திரன் முன்வைத்த குற்றச்சாட்டை மறுத்தார்.
தனது கோரிக்கையின் அடிப்படையிலோ அல்லது தூண்டுதலின் பேரிலோ சிலை அகற்றப்பட்டதாகக் கூறப்படுவது அபாண்டமானதும் அரசியல் காழ்ப்புணர்ச்சியின் வெளிப்பாடுமாகும் எனத் தெரிவித்தார்.
மேலும், தியாகி திலீபனின் நினைவேந்தலை வைத்து அரசியல் செய்வது நாகரிகமற்ற செயல் எனவும், நினைவேந்தல் விடயங்களில் தமிழ் தேசிய மக்கள் முன்னணி ஏனைய கட்சிகளைப் புறக்கணித்து ஏகபோக உரிமை கொண்டாடுவதாகவும் அவர் குற்றஞ்சாட்டினார்.
எனவே, இவ்வாறான அரசியல் காழ்ப்புணர்ச்சியை மக்கள் புரிந்துகொள்ள வேண்டும் எனவும் அவர் மேலும் தெரிவித்தார்.
