கைத்தொழில் மற்றும் தொழில்முயற்சியாண்மை அபிவிருத்தி அமைச்சும் இலங்கை ஏற்றுமதி அபிவிருத்திச் சபையும் இணைந்து ஏற்பாடு செய்த “புதிய ஏற்றுமதியாளர் அபிவிருத்தித் திட்டம்” (New Exporter Development Programme) தொடர்பான விழிப்புணர்வு நிகழ்வும் கண்காட்சியும் இன்று (01) திருகோணமலை மாவட்ட செயலகத்தில் நடைபெற்றது.
திருகோணமலை மாவட்டத்தைச் சேர்ந்த தொழில்முயற்சியாளர்களை இலக்காகக் கொண்டு ஏற்பாடு செய்யப்பட்ட இந்நிகழ்வில், தொழில் மற்றும் தொழில்முயற்சித் துறை அமைச்சர் சுனில் ஹந்துன்நெத்தி, வெளிவிவகார மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திரா, திருகோணமலை மாவட்ட நாடாளுமன்ற உறுப்பினர் ரொஷான் அக்மீமன, மாவட்ட அரசாங்க அதிபர் டபிள்யூ.ஜி.எம். ஹேமந்த குமார, இலங்கை ஏற்றுமதி அபிவிருத்திச் சபையின் தலைவர் மற்றும் அமைச்சின் பணிப்பாளர் மங்கள விஜேசிங்க உள்ளிட்ட பலரும் இந்நிகழ்வில் கலந்துகொண்டனர்.
நாட்டின் புதிய ஏற்றுமதியாளர்களை உருவாக்குதல், உள்ளூர் தொழில்முயற்சியாளர்களை சர்வதேச வர்த்தகச் சந்தைக்கு அறிமுகப்படுத்துதல் மற்றும் ஏற்றுமதி நடவடிக்கைகளை வெற்றிகரமாக முன்னெடுப்பதற்குத் தேவையான வழிகாட்டல்களை வழங்குதல் ஆகிய நோக்கங்களுடன் இவ்விழிப்புணர்வு நிகழ்வு ஏற்பாடு செய்யப்பட்டிருந்தது.
இதன்போது, ஏற்றுமதித் துறையில் காணப்படும் வாய்ப்புகள், ஏற்றுமதி நடைமுறைகள், சர்வதேச சந்தை வாய்ப்புகள், சந்தை அணுகுமுறைகள் மற்றும் அரசாங்கத்தினால் வழங்கப்படும் ஆதரவுகள் தொடர்பில் தொழில்முயற்சியாளர்களுக்கு விரிவான விளக்கங்கள் வழங்கப்பட்டன.
அத்துடன், உள்ளூர் உற்பத்திகளை சர்வதேச சந்தைக்கு கொண்டு செல்வதற்கான வழிமுறைகள் மற்றும் ஏற்றுமதி வர்த்தகத்தில் புதிதாக காலடி எடுத்து வைக்கும் தொழில்முயற்சியாளர்கள் எதிர்கொள்ளக்கூடிய சவால்கள் தொடர்பிலும் கலந்துரையாடல்கள் இடம்பெற்றன.
இந்நிகழ்வில் திருகோணமலை மாவட்டத்தைச் சேர்ந்த பெருமளவான தொழில்முயற்சியாளர்கள் கலந்துகொண்டதுடன், தமது உற்பத்திப் பொருட்களை சர்வதேச சந்தைக்கு கொண்டு செல்வது மற்றும் எதிர்காலத்தில் ஏற்றுமதி வர்த்தகத்தை விரிவுபடுத்துவது தொடர்பான தகவல்களையும் ஆலோசனைகளையும் பெற்றுக்கொண்டனர்.
