இலங்கையின் தென்மேற்கு கடற்பரப்பிலிருந்து சுமார் 15 மைல் தொலைவில், ஈரானுடன் தொடர்புடைய சுமார் 20 எண்ணெய் தாங்கிக் கப்பல்கள் நங்கூரமிட்டுள்ளதாகத் தெரிவிக்கப்படுகிறது.
அமெரிக்காவின் கடுமையான பொருளாதாரத் தடைகள் மற்றும் கடற்போக்குவரத்து கட்டுப்பாடுகள் காரணமாக குறித்த கப்பல்கள் பல்வேறு சிரமங்களை எதிர்கொண்டுள்ளதாகத் தகவல்கள் தெரிவிக்கின்றன. சில கப்பல்களில் உணவு, எரிபொருள் மற்றும் குடிநீர் உள்ளிட்ட அத்தியாவசியப் பொருட்களுக்கும் தட்டுப்பாடு ஏற்பட்டுள்ளதாகக் கூறப்படுகிறது.
சீனாவுக்கு கச்சா எண்ணெய் கொண்டு செல்லும் பணியில் ஈடுபட்டிருந்த குறித்த கப்பல்கள் தற்போது காலியாக இலங்கை கடலோரப் பகுதிக்கு அருகில் காணப்படுகின்றன.
அமெரிக்கத் தடைகளுக்கு உள்ளாக நேரிடும் என்ற அச்சம் காரணமாக, சில இலங்கை விநியோகஸ்தர்கள் கப்பல்களுக்கு தேவையான சேவைகளை வழங்கத் தயக்கம் காட்டுவதாகவும் தெரிவிக்கப்படுகிறது.
குறித்த கப்பல்கள் இலங்கையின் இறையாண்மைக்குட்பட்ட கடற்பரப்பிற்கு வெளியே, பிரத்யேக பொருளாதார வலயத்திற்கு அருகில் காணப்படுவதால், அவை தொடர்பில் இலங்கை அதிகாரிகளின் சட்டப்பூர்வ அதிகாரங்கள் வரையறுக்கப்பட்டுள்ளதாக தெரிவிக்கப்படுகிறது.
எவ்வாறாயினும், கப்பல்களின் நடமாட்டத்தை இலங்கை அதிகாரிகள் தொடர்ந்து கண்காணித்து வருவதாகக் கூறப்படுகிறது.
