புதிதாகத் தெரிவு செய்யப்பட்ட அஸ்வெசும நலன்புரித் திட்டப் பயனாளிகளுக்கான கொடுப்பனவுகள் எதிர்வரும் நவம்பர் 27ஆம் திகதி முதல் வழங்கப்படவுள்ளதாக நலன்புரி நன்மைகள் சபை அறிவித்துள்ளது.
புதிய பயனாளிகள் பட்டியல் தொடர்பான மேல்முறையீடுகள் மற்றும் ஆட்சேபனைகளைச் சமர்ப்பிப்பதற்கான கால அவகாசம் கடந்த நவம்பர் 15ஆம் திகதியுடன் நிறைவடைந்துள்ளது.
இதனைத் தொடர்ந்து, திருத்தப்பட்ட பட்டியலின் அடிப்படையில் தகுதியான பயனாளிகளை அடையாளம் காணும் நடவடிக்கைகள் தற்போது முன்னெடுக்கப்பட்டு வருவதாக நலன்புரி நன்மைகள் சபையின் தலைவர் நிமல் கொட்டாவெலகெதர தெரிவித்துள்ளார்.
இந்த நடவடிக்கைகளுக்காக ஒரு மாத கால அவகாசம் வழங்கப்பட்டுள்ளதுடன், பிரதேச செயலாளர்கள் ஊடாக மேல்முறையீடுகள் மற்றும் ஆட்சேபனைகள் மீளாய்வு செய்யப்படவுள்ளன.
மேலும், மத்திய கிழக்கு நிலைமைகளைக் கருத்திற்கொண்டு ஜனாதிபதியினால் அங்கீகரிக்கப்பட்ட விசேட கொடுப்பனவும், வறிய மற்றும் மிகவும் வறிய குடும்பங்களுக்கான வழமையான அஸ்வெசும கொடுப்பனவுகளுடன் இணைத்து வழங்கப்படவுள்ளதாக அறிவிக்கப்பட்டுள்ளது.
அஸ்வெசும திட்டம் தொடர்பான மேலதிக தகவல்களை 1924 என்ற தொலைபேசி இலக்கத்தின் ஊடாகப் பெற்றுக்கொள்ள முடியும் எனவும் நலன்புரி நன்மைகள் சபை தெரிவித்துள்ளது.







