உயர்கல்வி கற்பதற்காக முதன்முறையாக பெலாருஸ் செல்லும் இலங்கை மாணவர்களுக்கான நுழைவு விசா கட்டணத்தை ரத்து செய்ய அந்நாட்டு அரசாங்கம் தீர்மானித்துள்ளது.
கடந்த மே மாதம் வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் பெலாருஸுக்கு மேற்கொண்ட உத்தியோகபூர்வ விஜயத்தின் பயனாக இந்தத் தீர்மானம் எடுக்கப்பட்டுள்ளதாக இலங்கை வெளிவிவகார அமைச்சு தெரிவித்துள்ளது.
அத்துடன், பெலாருஸில் கல்வி பயிலும் இலங்கை மாணவர்களின் குடும்ப உறுப்பினர்கள் அந்நாட்டுக்குச் செல்வதற்கான விசா நடைமுறைகளை இலகுபடுத்துவதற்கான நடவடிக்கைகளும் ஆரம்பிக்கப்பட்டுள்ளன.
இந்தத் தீர்மானம் பெலாருஸில் உயர்கல்வி கற்க எதிர்பார்க்கும் இலங்கை மாணவர்களுக்கும், அங்கு கல்வி பயிலும் மாணவர்களின் குடும்ப உறுப்பினர்களுக்கும் பெரும் நிவாரணமாக அமையும் என வெளிவிவகார அமைச்சு மேலும் தெரிவித்துள்ளது.







