சிங்கப்பூரில் இருந்து நேற்றிரவு நாடு திரும்பிய முன்னாள் ஜனாதிபதி மகிந்த ராஜபக்ஷவின் மனைவி ஷிரந்தி ராஜபக்ஷவை, எதிர்வரும் 13ஆம் திகதி நிதிக்குற்றப் புலனாய்வுப் பிரிவில் (FCID) ஆஜராகுமாறு அறிவிக்கப்பட்டுள்ளது.
‘சிரிலிய சவிய’ அமைப்பின் நிதிப் பரிவர்த்தனைகள் தொடர்பில் முன்னெடுக்கப்பட்டு வரும் விசாரணையின் ஒரு பகுதியாக, ஷிரந்தி ராஜபக்ஷவிடம் வாக்குமூலம் பெற்றுக்கொள்ள FCID நடவடிக்கை எடுத்துள்ளதாக தெரிவிக்கப்படுகிறது.
இதற்கு முன்னர் FCID முன்னிலையில் ஆஜராகுமாறு அவருக்கு அழைப்பு விடுக்கப்பட்டிருந்த நிலையில், அவர் சிங்கப்பூரில் மருத்துவ சிகிச்சைக்காக சென்றிருந்ததாக தெரிவிக்கப்பட்டது. இதனால் திட்டமிட்ட தினத்தில் ஆஜராக முடியாத நிலையில், மேலதிக கால அவகாசம் கோரப்பட்டிருந்ததாகவும் செய்திகள் வெளியாகியிருந்தன.
இந்நிலையில், சிங்கப்பூரிலிருந்து நாடு திரும்பியுள்ள ஷிரந்தி ராஜபக்ஷவை எதிர்வரும் 13ஆம் திகதி FCID முன்னிலையில் ஆஜராகுமாறு மீண்டும் அழைப்பு விடுக்கப்பட்டுள்ளது.
விசாரணைகளின் போது நிதிப் பரிவர்த்தனைகள் மற்றும் குறித்த அமைப்புடன் தொடர்புடைய விடயங்கள் தொடர்பில் அவரிடம் வாக்குமூலம் பெறப்படலாம் என எதிர்பார்க்கப்படுகிறது.
எவ்வாறாயினும், விசாரணை தொடர்பான இறுதி சட்ட நடவடிக்கைகள் குறித்து அதிகாரப்பூர்வமாக எவ்வித தகவலும் வெளியாகவில்லை. விசாரணைகள் தொடர்ந்தும் முன்னெடுக்கப்பட்டு வருகின்றன.
