களுத்துறை, வஸ்கடுவ பகுதியில் இன்று (08) காலை இடம்பெற்ற கோர விபத்தில் களனிப் பல்கலைக்கழகத்தில் கல்வி பயிலும் 21 வயதுடைய மாணவர் ஒருவர் உயிரிழந்துள்ளார்.
களனிப் பல்கலைக்கழக மாணவர்கள் குழுவொன்று மோட்டார் சைக்கிள்களில் கொழும்பில் இருந்து காலி நோக்கி சுற்றுலா சென்றுகொண்டிருந்தபோதே இந்த விபத்து இடம்பெற்றுள்ளது.
வீதியில் பயணித்துக்கொண்டிருந்த போது, குறித்த மாணவர் சென்ற மோட்டார் சைக்கிள் கட்டுப்பாட்டை இழந்து வலதுபுறமாகச் சரிந்து விழுந்ததாகவும், எதிர்த்திசையில் பாடசாலை மாணவர்களை ஏற்றிச் சென்ற பேருந்தின் பின்பக்க சக்கரத்தில் சிக்கியதாகவும் ஆரம்பகட்ட விசாரணைகளில் தெரியவந்துள்ளது.
விபத்தில் படுகாயமடைந்த மாணவர் சம்பவ இடத்திலேயே உயிரிழந்ததாக களுத்துறை வடக்கு பொலிஸார் தெரிவித்துள்ளனர்.
உயிரிழந்தவர் களனிப் பல்கலைக்கழகத்தின் தொழில்நுட்ப பீடத்தில் கல்வி பயின்ற சித்தும் சங்கல்ப என அடையாளம் காணப்பட்டுள்ளார்.
விபத்து காரணமாக காலி வீதியில் கடும் போக்குவரத்து நெரிசல் ஏற்பட்டிருந்த நிலையில், பொலிஸார் தலையிட்டு போக்குவரத்து நிலைமையை சீர்செய்துள்ளனர்.
சம்பவம் தொடர்பில் பேருந்தின் சாரதி கைது செய்யப்பட்டுள்ளதுடன், அவரை களுத்துறை நீதவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.
