களுத்துறை, நாகொட பகுதியில் பொலிஸாரின் உத்தரவை மீறிச் சென்ற முச்சக்கர வண்டி மீது பொலிஸார் நடத்திய துப்பாக்கிச் சூட்டில், அதன் சாரதி காயமடைந்த நிலையில் வைத்தியசாலையில் அனுமதிக்கப்பட்டுள்ளார்.
களுத்துறை குற்றப்பிரிவின் பொலிஸ் குழுவினர், போம்புவெல பகுதியில் சந்தேகத்திற்கிடமான முச்சக்கர வண்டியொன்றை நிறுத்துமாறு அதன் சாரதிக்கு உத்தரவிட்டுள்ளனர்.
எனினும், பொலிஸாரின் உத்தரவைப் புறக்கணித்த சாரதி, முச்சக்கர வண்டியை நிறுத்தாமல் தொடர்ந்து செலுத்திச் சென்றுள்ளார்.
இதனையடுத்து, பொலிஸார் சுமார் நான்கு கிலோமீற்றர் தூரம் வரை குறித்த முச்சக்கர வண்டியைப் பின்தொடர்ந்துள்ளனர். பின்னர், நாகொட பகுதியில் வைத்து முச்சக்கர வண்டி மீது துப்பாக்கிச் சூடு நடத்தப்பட்டதாகத் தெரிவிக்கப்படுகிறது.
இந்தச் சம்பவத்தில் காயமடைந்த சாரதி, நாகொட போதனா வைத்தியசாலையில் சிகிச்சைக்காக அனுமதிக்கப்பட்டுள்ளார்.
காயமடைந்தவர் களுத்துறை, ராஜவத்தை பகுதியைச் சேர்ந்த ‘ராஜவத்தை சஞ்சு’ என அழைக்கப்படும் நபர் என அடையாளம் காணப்பட்டுள்ளார்.
சம்பவத்தைத் தொடர்ந்து முச்சக்கர வண்டியைச் சோதனையிட்ட பொலிஸார், அதிலிருந்து போதைப்பொருட்களையும் மீட்டுள்ளதாகத் தெரிவிக்கப்பட்டுள்ளது.
சம்பவம் தொடர்பில் மேலதிக விசாரணைகள் முன்னெடுக்கப்பட்டு வருகின்றன.
