கொழும்பு விகாரமஹாதேவி பூங்காவில் பாதுகாப்பு மற்றும் பொது அமைதிக்குக் குந்தகம் விளைவிக்கும் வகையில் கருத்துத் தெரிவித்ததாகக் கூறப்படும் பலாங்கொட கஸ்ஸப தேரருக்கு எதிராக விசாரணைகள் ஆரம்பிக்கப்பட்டுள்ளதாக கறுவாகாடு பொலிஸார் கொழும்பு பிரதான நீதவான் நீதிமன்றில் தெரிவித்துள்ளனர்.
தேசிய மக்கள் சக்தியின் (NPP) தலைமையக அமைப்பாளர் ஜகத் பஸ்நாயக்க அளித்த முறைப்பாட்டின் அடிப்படையில் இந்த விசாரணைகள் முன்னெடுக்கப்பட்டு வருகின்றன.
நீதிமன்ற அவமதிப்பு வழக்கில் சிறைத்தண்டனை அனுபவித்து வரும் பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரரை உடனடியாக விடுதலை செய்யுமாறு கோரி, பலாங்கொட கஸ்ஸப தேரர் உள்ளிட்ட குழுவினர் விகாரமஹாதேவி பூங்காவில் சத்தியாக்கிரகப் போராட்டத்தில் ஈடுபட்டிருந்தனர்.
இதன்போது, கடந்த ஒக்டோபர் 22ஆம் திகதி ஊடகங்களுக்குக் கருத்துத் தெரிவித்த கஸ்ஸப தேரர், இரு கத்திகளுடன் இருவர் போராட்டம் நடைபெற்ற இடத்திற்கு வந்ததாகவும், அவர்கள் பெலவத்தையில் அமைந்துள்ள தேசிய மக்கள் சக்தி அலுவலகத்திலிருந்து அனுப்பப்பட்டவர்கள் என்றும் தெரிவித்திருந்தார்.
எனினும், இந்தக் கூற்று பொய்யானது என்றும், பொதுமக்களைத் தவறாக வழிநடத்தக்கூடியது என்றும் பொலிஸார் நீதிமன்றில் சுட்டிக்காட்டியுள்ளனர்.
பொலிஸ் கட்டளைச் சட்டத்தின் 98ஆவது பிரிவின் கீழ் பொய்யான தகவல்களைப் பரப்புவது தொடர்பான சட்ட ஏற்பாடுகளையும் குறிப்பிட்ட பொலிஸார், சம்பவம் தொடர்பான மேலதிக விசாரணைகளுக்காக ஊடக நிறுவனங்களிடமிருந்து தொகுக்கப்படாத காணொளிப் பதிவுகளைப் பெற்றுக்கொள்ள நீதிமன்ற உத்தரவை கோரியுள்ளனர்.
இரு தரப்பு சமர்ப்பணங்களையும் ஆராய்ந்த கொழும்பு பிரதான நீதவான் அஸங்க எஸ். போதரகம, குறித்த உரை தொடர்பான தொகுக்கப்படாத காணொளிப் பதிவுகளைப் பொலிஸாரிடம் ஒப்படைக்குமாறு சம்பந்தப்பட்ட ஊடக நிறுவனங்களுக்கு உத்தரவிட்டுள்ளார்.
அத்துடன், விசாரணைகளின் முன்னேற்றம் தொடர்பான அறிக்கையை விரைவாக நீதிமன்றில் சமர்ப்பிக்குமாறும் பொலிஸாருக்கு நீதவான் அறிவுறுத்தியுள்ளார்.
இந்தச் சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன.
