சமூக ஊடகங்களில் பிரபலம் அடைவதற்கும் பணம் சம்பாதிப்பதற்கும் சிறுவர்களை ஆபத்தான மற்றும் பொருத்தமற்ற செயல்களில் ஈடுபடுத்துவதைத் தடுக்கும் வகையில் புதிய விதிமுறைகள் அறிமுகப்படுத்தப்படவுள்ளதாக பெண்கள் மற்றும் குழந்தைகள் நலத்துறை அமைச்சர் சரோஜா போல்ராஜ் தெரிவித்துள்ளார்.
சிறுவர்களை ஆபத்தான இடங்களுக்கு அழைத்துச் செல்வது, தகாத வார்த்தைகளைப் பேச வைப்பது, வயது வந்தோருக்கான உள்ளடக்கங்களில் அவர்களைப் பயன்படுத்துவது உள்ளிட்ட செயல்கள் சமூக ஊடகங்களில் இடம்பெறுவதாக அவர் சுட்டிக்காட்டியுள்ளார்.
அத்துடன், குழந்தைகளின் பாலியல் தன்மையை வெளிப்படுத்தும் வகையிலான காணொளிகள் மற்றும் உள்ளடக்கங்களை உருவாக்குவதும் அவர்களின் பாதுகாப்புக்கும் தனியுரிமைக்கும் அச்சுறுத்தலாக அமைவதாக அவர் குறிப்பிட்டுள்ளார்.
சமூக ஊடகங்களில் புகழ்பெறுவதற்காகவோ வருமானம் ஈட்டுவதற்காகவோ குழந்தைகளின் பாதுகாப்பையும் தனியுரிமையையும் ஆபத்துக்கு உள்ளாக்குவதற்கு பெற்றோருக்கு எந்த உரிமையும் இல்லை எனவும் அமைச்சர் வலியுறுத்தியுள்ளார்.
இவ்வாறான செயற்பாடுகளைக் கட்டுப்படுத்தி, சிறுவர்களின் உரிமைகளையும் பாதுகாப்பையும் உறுதிப்படுத்தும் நோக்கில் புதிய விதிகள் மற்றும் ஒழுங்குமுறைகள் அறிமுகப்படுத்தப்படவுள்ளதாக அவர் தெரிவித்துள்ளார்.
