அரசாங்கமே, இந்தச் சட்டத்தை உடனே கைவிடுங்கள்; சர்வதேச மன்னிப்புச் சபை கடும் எச்சரிக்கை!

சந்தேக நபர்களுக்கு இரண்டு ஆண்டுகள் வரை சிறை; நீதிமன்றக் கண்காணிப்பின்றி தனிப்பட்ட தகவல்களைப் பெறவும் அதிகாரம்? இலங்கையின் புதிய சட்டமூலத்தால் மனித உரிமைகளுக்குப் பேராபத்து என எச்சரிக்கை!

இலங்கையில் முன்மொழியப்பட்டுள்ள ஒழுங்கமைக்கப்பட்ட குற்றங்களைத் தடுக்கும் சட்டமூலத்தை உடனடியாகத் திரும்பப் பெறுமாறு சர்வதேச மன்னிப்புச் சபை (Amnesty International) அரசாங்கத்தைக் கடுமையாக வலியுறுத்தியுள்ளது.

இந்தச் சட்டமூலம் காவல்துறைக்கும் அதிகாரிகளுக்கும் விரிவான அதிகாரங்களை வழங்குவதுடன், அடிப்படை மனித உரிமைகள், தனியுரிமை மற்றும் நியாயமான விசாரணைக்கான உரிமை ஆகியவற்றைப் பாதிக்கக்கூடும் என அந்த அமைப்பு எச்சரித்துள்ளது.

செவ்வாய்க்கிழமை (27) வெளியிடப்பட்ட அறிக்கையில், தேசிய மக்கள் சக்தி (NPP) அரசாங்கத்தினால் முன்மொழியப்பட்டுள்ள சட்டங்களில் மிகவும் கவலைக்குரிய ஒன்றாக இந்தச் சட்டமூலத்தை சர்வதேச மன்னிப்புச் சபை சுட்டிக்காட்டியுள்ளது.

முன்மொழியப்பட்ட சட்டத்தின்படி, சந்தேக நபர்களை குற்றச்சாட்டுகள் பதிவு செய்யப்படுவதற்கு முன்னர் ஓராண்டு வரையும், அதன் பின்னர் மேலும் ஓராண்டு வரையும் தடுப்புக்காவலில் வைக்க முடியும் எனக் கூறப்படுகிறது.

மேலும், உதவிப் பொலிஸ் அத்தியட்சகர் அல்லது அதற்கு மேற்பட்ட பதவியிலுள்ள பொலிஸ் அதிகாரிகளிடம் பெறப்படும் வாக்குமூலங்களை நீதிமன்றத்தில் சாட்சியமாகப் பயன்படுத்த அனுமதிக்கும் ஏற்பாடுகளும் கடும் கவலையை ஏற்படுத்தியுள்ளன.

இத்தகைய விதிகள், சித்திரவதை மற்றும் வற்புறுத்தலின் மூலம் வாக்குமூலங்கள் பெறப்படும் அபாயத்தை அதிகரிக்கக்கூடும் என சர்வதேச மன்னிப்புச் சபை சுட்டிக்காட்டியுள்ளது.

ஒருவர் ஒழுங்கமைக்கப்பட்ட குற்றக் குழுவுடன் தொடர்புடையவரா என்பதைத் தீர்மானிப்பதில், அவரது உடை, பச்சை குத்தல்கள், கைச் சைகைகள், மொழி, தொடர்புகள் மற்றும் அவர் சென்ற இடங்கள் போன்றவற்றைக் கருத்தில் கொள்ளக்கூடிய ஏற்பாடுகள் குறித்தும் அந்த அமைப்பு கவலை தெரிவித்துள்ளது.

இத்தகைய அளவுகோல்கள் தவறாகப் பயன்படுத்தப்பட்டால், குறிப்பிட்ட சமூகத்தினர் மீது சந்தேகப் பார்வை செலுத்தப்படுவதற்கும் பாரபட்சமான நடவடிக்கைகள் அதிகரிப்பதற்கும் வழிவகுக்கும் என எச்சரிக்கப்பட்டுள்ளது.

நீதிமன்ற உத்தரவின்றி பொலிஸார் சோதனைகளை மேற்கொள்வதற்கும், தொலைபேசி பதிவுகள், சந்தாதாரர் விவரங்கள் மற்றும் சாதனங்களின் இருப்பிடத் தரவுகள் உள்ளிட்ட தனிப்பட்ட தகவல்களைப் பெறுவதற்கும் வழிவகுக்கும் விதிகள் குறித்தும் கேள்விகள் எழுப்பப்பட்டுள்ளன.

இவ்வாறான அதிகாரங்கள் முறையான நீதிமன்ற மேற்பார்வையின்றிப் பயன்படுத்தப்பட்டால், பத்திரிகையாளர்களின் தகவல் மூலங்கள், வழக்கறிஞர்களின் இரகசியத் தகவல்தொடர்புகள் மற்றும் சட்டபூர்வமான போராட்டங்களை ஏற்பாடு செய்பவர்கள் கண்காணிப்புக்கு உள்ளாகும் அபாயம் இருப்பதாக சர்வதேச மன்னிப்புச் சபை தெரிவித்துள்ளது.

அத்துடன், சட்ட நடவடிக்கைகள் தொடர்பான ஊடகச் செய்திகளைக் கட்டுப்படுத்தக்கூடிய ஏற்பாடுகளும் கருத்துச் சுதந்திரம் மற்றும் ஊடகச் சுதந்திரம் தொடர்பான கவலைகளை எழுப்பியுள்ளன.

தனிநபர்கள் பொலிஸாருக்குத் தகவல் வழங்க வேண்டும் எனக் குறிப்பிடும் விதிகளையும் அந்த அமைப்பு விமர்சித்துள்ளது.

அவ்வாறு தகவல் வழங்கத் தவறுவோருக்கு ஏழு ஆண்டுகள் வரை சிறைத்தண்டனை அல்லது 200,000 ரூபாய் வரை அபராதம் விதிக்கப்படக்கூடிய ஏற்பாடுகள் இருப்பதாகக் குறிப்பிடப்பட்டுள்ளது.

இந்த விதிகள் பொதுமக்கள் மத்தியில் அச்சத்தை ஏற்படுத்துவதுடன், தனிநபர் சுதந்திரத்தையும் பாதிக்கக்கூடும் எனச் சுட்டிக்காட்டப்பட்டுள்ளது.

இலங்கையின் பயங்கரவாதத் தடுப்புச் சட்டத்தின் (PTA) கீழ் கடந்த காலங்களில் இடம்பெற்றதாகக் குற்றஞ்சாட்டப்பட்ட தன்னிச்சையான தடுப்புக்காவல், சித்திரவதை மற்றும் ஏனைய மனித உரிமை மீறல்களுக்கு வழிவகுத்த சூழல்கள் மீண்டும் உருவாகக்கூடும் என்றும் சர்வதேச மன்னிப்புச் சபை எச்சரித்துள்ளது.

எனவே, முன்மொழியப்பட்ட சட்டமூலத்தை முழுமையாகத் திரும்பப் பெறுவதுடன், ஒழுங்கமைக்கப்பட்ட குற்றங்களை எதிர்த்துப் போராடுவதற்கான மாற்று நடவடிக்கைகள் குறித்து அர்த்தமுள்ள பொதுக் கலந்துரையாடல்களை முன்னெடுக்குமாறும் அரசாங்கத்திடம் கோரிக்கை விடுக்கப்பட்டுள்ளது.

இலங்கை மனித உரிமைகள் ஆணைக்குழு மற்றும் இலங்கை சட்டத்தரணிகள் சங்கம் ஆகியவையும் இந்தச் சட்டமூலத்தைத் திரும்பப் பெறுமாறு வலியுறுத்தியுள்ளன.

ஒழுங்கமைக்கப்பட்ட குற்றக் குழுக்களுக்கு எதிரான நடவடிக்கைகளை வலுப்படுத்துவதும், கடுமையான குற்றங்களை எதிர்கொள்வதில் சர்வதேச ஒத்துழைப்பை மேம்படுத்துவதும் இந்தச் சட்டமூலத்தின் நோக்கம் என அரசாங்கம் தெரிவித்துள்ளது.

இந்தச் சட்டமூலம் ஒக்டோபர் 6ஆம் திகதி வர்த்தமானியில் வெளியிடப்பட்டு, ஒக்டோபர் 20ஆம் திகதி நாடாளுமன்றத்தில் சமர்ப்பிக்கப்பட்டது. தற்போது அது முதலாம் வாசிப்பு நிலையில் உள்ளது.

ஒழுங்கமைக்கப்பட்ட குற்றங்களை ஒடுக்குவதற்கான சட்டம், பொதுமக்களின் அடிப்படை உரிமைகளையும் பாதுகாக்குமா? அல்லது அதிகார துஷ்பிரயோகத்திற்கான வாய்ப்புகளை அதிகரிக்குமா? என்ற கேள்வி, இந்தச் சட்டமூலைச் சுற்றியுள்ள விவாதத்தின் மையமாக மாறியுள்ளது.