வாங்கும் திறன் சமநிலையின் (Purchasing Power Parity – PPP) அடிப்படையில் கணக்கிடும்போது, உலகிலேயே சிகரெட் விலை அதிகமுள்ள நாடாக இலங்கை அடையாளம் காணப்பட்டுள்ளதாக ஒக்ஸ்போர்ட் எகனாமிக்ஸ் (Oxford Economics) வெளியிட்டுள்ள மதிப்பீட்டில் தெரிவிக்கப்பட்டுள்ளது.
உலக சுகாதார அமைப்பின் (WHO) சமீபத்திய தரவுகளை அடிப்படையாகக் கொண்டு இந்த மதிப்பீடு மேற்கொள்ளப்பட்டுள்ளது.
சிகரெட்டின் சில்லறை விலையில் குறைந்தபட்சம் 75 சதவீதம் வரியாக இருக்க வேண்டும் என்ற உலக சுகாதார அமைப்பின் இலக்கு குறித்தும் இந்த மதிப்பீடு கேள்விகளை எழுப்பியுள்ளது.
நாடுகளுக்கு இடையே பொருளாதார நிலைமைகள் மற்றும் மக்களின் வாங்கும் திறன் வேறுபடுவதால், அனைத்து நாடுகளுக்கும் ஒரே மாதிரியான வரி இலக்கைப் பயன்படுத்துவது பொருத்தமானதா என ஒக்ஸ்போர்ட் எகனாமிக்ஸ் சுட்டிக்காட்டியுள்ளது.
மேலும், சிகரெட்டின் சில்லறை விலையில் வரியின் பங்கு அதிகமாக இருப்பதால் மட்டுமே புகைப்பிடிக்கும் பழக்கம் குறையும் என உறுதியாகக் கூற முடியாது என்றும் அந்த மதிப்பீட்டில் குறிப்பிடப்பட்டுள்ளது.
ஆய்வின்படி, சிகரெட்டின் சில்லறை விலையில் வரியின் சதவீதத்திற்கும், ஒரு நாட்டின் புகைப்பிடிக்கும் விகிதத்திற்கும் இடையில் குறிப்பிடத்தக்க தொடர்பு காணப்படவில்லை எனத் தெரிவிக்கப்பட்டுள்ளது.
அத்துடன், வரியின் சதவீதத்தை விட சிகரெட்டின் உண்மையான விலையே நுகர்வோரின் கொள்வனவு முடிவுகளில் அதிக தாக்கத்தை ஏற்படுத்தக்கூடும் என்றும் சுட்டிக்காட்டப்பட்டுள்ளது.
எனவே, புகையிலைக் கட்டுப்பாட்டுக் கொள்கைகளை மதிப்பிடும்போது வரி விதிப்பை மட்டும் அடிப்படையாகக் கொள்ளாமல், சிகரெட்டின் உண்மையான விலை, மக்களின் வாங்கும் திறன் மற்றும் புகைப்பிடிக்கும் பழக்கம் உள்ளிட்ட பல்வேறு காரணிகளையும் கருத்தில் கொள்ள வேண்டும் என ஒக்ஸ்போர்ட் எகனாமிக்ஸ் வலியுறுத்தியுள்ளது.
