1983ஆம் ஆண்டு இடம்பெற்ற கருப்பு ஜூலை இனக்கலவரம் மற்றும் அதன் தாக்கங்கள் குறித்து விரிவான ஆய்வுகளை மேற்கொள்வதற்காக விசேட நாடாளுமன்றக் குழுவொன்றை நியமிக்குமாறு கோரி புதிய யோசனையொன்று நாடாளுமன்றத்தில் முன்வைக்கப்பட்டுள்ளது.
தேசிய மக்கள் சக்தியின் நாடாளுமன்ற உறுப்பினர் தனுர திஸாநாயக்கவினால் இந்த யோசனை சமர்ப்பிக்கப்பட்டுள்ளதுடன், அதே கட்சியின் நாடாளுமன்ற உறுப்பினர் பாக்ய ஸ்ரீ ஹேரத் அதற்கு ஆதரவு தெரிவித்துள்ளார்.
1983ஆம் ஆண்டு கருப்பு ஜூலை சம்பவம் தொடர்பான வரலாற்றுப் பின்னணி, அதன் விளைவுகள் மற்றும் பாதிக்கப்பட்ட மக்களின் நிலைமைகள் குறித்து விரிவான ஆய்வுகளை முன்னெடுப்பதே இந்தக் குழுவின் பிரதான நோக்கமாகும்.
மேலும், இனங்களுக்கு இடையிலான நல்லிணக்கத்தை வலுப்படுத்துதல், பாதிக்கப்பட்ட மக்களுக்கு உரிய நிவாரணங்களை வழங்குதல் மற்றும் எதிர்காலத்தில் இவ்வாறான சம்பவங்கள் மீண்டும் இடம்பெறுவதைத் தடுப்பதற்கான நடவடிக்கைகள் தொடர்பில் பரிந்துரைகளை முன்வைப்பதும் இக்குழுவின் பணிகளில் உள்ளடக்கப்படவுள்ளதாகத் தெரிவிக்கப்பட்டுள்ளது.
இதற்கமைய, மேற்கொள்ளப்படும் ஆய்வுகளின் அடிப்படையில் உரிய யோசனைகள் மற்றும் பரிந்துரைகளை நாடாளுமன்றத்தில் சமர்ப்பிப்பதே குறித்த விசேட குழுவின் எதிர்பார்ப்பாகும்.
