நாட்டில் நிலவி வரும் எரிவாயு கொள்கலன்களுக்கான தட்டுப்பாட்டுக்கு மத்தியில், வவுனியாவில் சட்டவிரோதமாகப் பதுக்கி வைக்கப்பட்டிருந்த 33 லிட்ரோ எரிவாயு சிலிண்டர்கள் பாவனையாளர் அதிகார சபையினால் கைப்பற்றப்பட்டுள்ளன.
பாவனையாளர் அதிகார சபையின் வவுனியா மாவட்ட பொறுப்பதிகாரி எச்.எம். இஹ்திசான் தலைமையில் நேற்று (04) முன்னெடுக்கப்பட்ட விசேட தேடுதல் மற்றும் சுற்றிவளைப்பு நடவடிக்கையின்போதே இவை மீட்கப்பட்டுள்ளன.
வவுனியாவின் பிரதான எரிவாயு விநியோகஸ்தர் ஒருவரினால் குறித்த சிலிண்டர்கள் பதுக்கி வைக்கப்பட்டிருந்தமை விசாரணைகளில் தெரியவந்துள்ளது.
பொதுமக்களுக்கு முறையாக விநியோகிக்கப்பட வேண்டிய எரிவாயு சிலிண்டர்களைப் பதுக்கி வைத்து, செயற்கையான தட்டுப்பாட்டை உருவாக்கி அதிக விலைக்கு விற்பனை செய்யும் நோக்கில் இவ்வாறு செயற்பட்டதாக அதிகாரிகள் தெரிவித்துள்ளனர்.
இதனையடுத்து, சம்பந்தப்பட்ட விநியோகஸ்தருக்கு எதிராக சட்ட நடவடிக்கை எடுக்கப்பட்டுள்ளதுடன், வழக்குப் பதிவு செய்து நீதிமன்றத்தில் முன்னிலைப்படுத்துவதற்கான நடவடிக்கைகளும் முன்னெடுக்கப்பட்டு வருகின்றன.
