எதிர்வரும் தீபாவளிப் பண்டிகையை முன்னிட்டு, கொழும்பிலிருந்து சொந்த ஊர்களுக்குச் செல்லும் பயணிகளின் போக்குவரத்து வசதிக்காக இலங்கை போக்குவரத்துச் சபை (SLTB) மற்றும் தேசிய போக்குவரத்து ஆணைக்குழு (NTC) இணைந்து விசேட பேருந்து சேவைகளை ஆரம்பித்துள்ளன.
இம்முறை தீபாவளிப் பண்டிகை எதிர்வரும் நவம்பர் 8ஆம் திகதி கொண்டாடப்படவுள்ள நிலையில், நவம்பர் 6ஆம் திகதி முதல் பெருமளவிலான பயணிகள் கொழும்பு புறக்கோட்டை மத்திய பேருந்து நிலையம் மற்றும் பெஸ்டியன் மாவத்தை தனியார் பேருந்து நிலையம் ஊடாகத் தமது சொந்த ஊர்களுக்குப் பயணிப்பார்கள் என எதிர்பார்க்கப்படுகிறது.
இதற்கமைய, நவம்பர் 6 மற்றும் 7ஆம் திகதிகளில் கொழும்பிலிருந்து ஹட்டன், தலவாக்கலை, நுவரெலியா உள்ளிட்ட பகுதிகளுக்குச் செல்லும் பேருந்துகளுக்கான பெரும்பாலான இருக்கைகள் ஏற்கனவே முன்பதிவு செய்யப்பட்டுள்ளதாகத் தெரிவிக்கப்பட்டுள்ளது.
அதேவேளை, யாழ்ப்பாணம், வவுனியா, பதுளை, மட்டக்களப்பு மற்றும் அம்பாறை உள்ளிட்ட பகுதிகளுக்குச் செல்லும் பேருந்துகளுக்கான இருக்கை முன்பதிவுகளும் வேகமாக இடம்பெற்று வருகின்றன.
எனவே, பண்டிகைக் காலத்தில் ஏற்படக்கூடிய பயணிகள் நெரிசல் மற்றும் இறுதி நேர அசௌகரியங்களைத் தவிர்ப்பதற்காகப் பயணிகள் முன்கூட்டியே தங்களுக்கான பேருந்து இருக்கைகளை உறுதிப்படுத்திக்கொள்ளுமாறு அறிவுறுத்தப்பட்டுள்ளனர்.
இதற்காக 1315.lk அல்லது sltbeseat.lk ஆகிய இணையத்தளங்கள் ஊடாகப் பேருந்து இருக்கைகளை முன்பதிவு செய்துகொள்ள முடியும் என சம்பந்தப்பட்ட நிறுவனங்கள் தெரிவித்துள்ளன.
