யாழ்ப்பாணத்தில் குறுகிய காலத்திற்குள் பெருமளவு சொத்துக்களைக் குவித்துள்ள சுமார் 18 பேர் பொலிஸாரின் விசாரணை மற்றும் கண்காணிப்பு வலயத்துக்குள் கொண்டுவரப்பட்டுள்ளதாக யாழ்ப்பாணப் பொலிஸார் தெரிவித்துள்ளனர்.
போதைப்பொருள் கடத்தல், மீட்டர் வட்டி, கப்பம் உள்ளிட்ட சட்டவிரோத நடவடிக்கைகள் மூலம் குறுகிய காலத்தில் பெருமளவு சொத்துக்களைச் சேர்த்துள்ளதாகச் சந்தேகிக்கப்படும் நபர்களே இவ்வாறு விசாரணைக்கு உட்படுத்தப்பட்டுள்ளனர்.
இவர்களில் சிலரின் சொத்து விபரங்களை நீதிமன்ற உத்தரவின் அடிப்படையில் குறிப்பிட்ட காலப்பகுதிக்குள் சமர்ப்பிக்குமாறு ஏற்கனவே அறிவுறுத்தப்பட்டிருந்தது.
எனினும், உரிய முறையில் சொத்து விபரங்களைச் சமர்ப்பிக்கத் தவறியவர்களின் சொத்துக்களை நீதிமன்றத்தின் ஊடாகப் பறிமுதல் செய்வதற்கான நடவடிக்கைகள் முன்னெடுக்கப்படவுள்ளதாகப் பொலிஸார் தெரிவித்துள்ளனர்.
சட்டவிரோத வழிகளில் சொத்துக்களைக் குவித்துள்ளதாகச் சந்தேகிக்கப்படும் ஏனைய நபர்கள் தொடர்பிலும் விசாரணைகள் முன்னெடுக்கப்பட்டு வருவதாகத் தெரிவிக்கப்படுகிறது.
